Ran vulh lama thiamna nei kan mamawhna a sang - CM
Nimin khan chief minister Lalduhoma chuan College of Veterinary Sciences & Animal Husbandry, Central Agriculture University (Imphal), Selesih din cham kum 27-na lawmna a hmanpui a, college campus chhunga sak thei leh thlai thianghlim dan endikna Pesticide Residue Analysis Laboratory a hawng nghal. CM chuan ran vulh lama thiamna nei mamawhna a san thu a sawi.
Chief Minister chuan Selesih Vety College chu Mizoram mai ni loin, India hmarchhak state dangte tana zirna-in ṭangkai a nih thu sawiin, "Tluang taka kum 27 zet a kal ta hi a lawmawm hle a ni. Kan hriat angin Mizoram mipui tam ber hi agriculture kaihhnawiha eizawng kan ni a, ran vulh phei chu kan uar em em. Ranvulh leh enkawl lama thiamna nei kan mamawhna a sang a, mipuite hnena zirtirna uar taka kalpui a ngai," a ti.
Mizoram mamawh em emte thawhsaktu ṭangkai tak chu College of Veterinary Sciences & Animal Husbandry hi a nih thu sawiin Lalduhoma chuan, "Mipuite eizawnna leh he college hi a inzawm tlat avangin mipuite pawhin he college leh Thenzawl Horticulture College hi kan ngaihven a ni," a ti a, zirtirtu leh thawktute inpekna fakin, zirlai naupangte pawh taima taka an zirlaite zir tlat turin a fuih a ni.
Chief Minister hian, Pesticide Residue Analysis Laboratory chu All India Networks Project on Pesticide Residue hnathawh nan chauh ni loin kan loneitute tan leh kan thlai lakluhte endikna atan a ṭangkai thei dawn tih sawiin, "Vantlang hriselna ṭha tawk kan neih theihna atana hmanraw pawimawh a ni. Zirlai leh zirbingna neite tan a ṭangkai hle bawk ang. Mizoram tan hmasawnna chhinchhiahtlak a ni," a ti.
Foundation day lawmna hi college auditorium-ah buatsaih a ni a, AH & Vety minister C Lalsaivunga leh Agriculture minister PC Vanlalruata te pawhin an hman pui.
College of Veterinary Sciences & Animal Husbandry, Central Agriculture University-ah hian zirlai naupang 440 an awm mek a, kum 1997 a bul an ṭan aṭanga chhiarin tun thlengin BVSc & AH Graduate naupang 891, post graduate 378 leh Ph.D 15 an zirchhuak tawh a ni.
Sorkar laipui chuan thlai hrisel leh thianghlim thar a tulzia hriain kum 1985 kha All India Network Project on Pesticide Residue a din a, anni hian ram pumah centre 19 an nei ṭhin. Kum 2010 khan hmarchhak biala a awm chhun ni turin Selesih Vety College pawh hi centre pakhatah a pawm. Kum 2019 khan hmanraw changtlung leh centre puitling tak a nih theih nan college hian Mizoram sorkarah RKVY Scheme kaltlangin cheng nuai 1,180 lakh man project a thehlut a, sorkar laipui hian lo pawnsakin, hmalak zui nghal a ni.