KHAWTHLIR

MICE-in thisen pe

Mizoram Institute of Comprehensive Education (MICE) NSS chuan nimin khan Civil Hospital, Aizawl Blood Bank-ah thisen unit 18 an pe a, petute mipa 16 leh hmeichhia pahnih an ni.

Din champha lawm

Association for Voluntary Blood Donation (AVBD), Lawngtlai Branch chuan nimin khan an din champha vawi 15-na Lawngtlai DC Conference Hall-ah an hmang a, Lawngtlai additional DC David Lalrinawma'n a hmanpui. Khuallian chuan, thisen pek chu ringtute tih tur a nih thu sawiin, "Kan ṭhat lai hun hian thisen pek kawngah ṭan i la thar zel ang u," tiin kal khawmte a sáwm.

Chetsualnaah thi

Lalmuanawma (35) s/o Rosiamliana, Khatla Veng chu November 9, Pathianni zing dar 2:25 khan scooter-a a chetsual vangin a thi. Lalmuanawma hi thil lei tura a chhuak a haw lamah New Capital Complex gate a su a, kawnga tlante'n hmuin damdawi-inah hruai mah se, chhan theih a ni tawh lo.

Raltlan ṭanpuina

Nimin khan Brisbane, Australia-ah Mizo Zirlai Pawl (MZP), Humanitarian & Development Research Initiative (HADRI) leh Australia Chin Community Council(ACCC) ṭangkawpin Mizoram chhunga raltlante ṭanpuina tura an buatsaih 'Humanitarian Hub Enablement' tlangzarh a ni. Mizoram aṭangin MZP president hlui, Rajya Sabha MP K Vanlalvena leh MZP general secretary C Lalhmingsangate'n an telpui.

MCC zirtir

Lai Autonomous District Council (LADC) hnuaia 12th Member of District Council (MDC) inthlanpui neih tur atana inbuatsaihna kal zelah nimin khan Lawngtlai DC conference hall-ah Flying Squad Team (FST) leh Static Surveillance Team (SST)-te tan training neih a ni a; model code of conduct (MCC) chungchang inzirtir a ni.