IPR Minister leh MJA hruaitute inkâwm

Information & Public Relations minister thar B Lalchhanzova chuan November 10, Thawhṭanni khan a pisaah Mizoram Journalists' Association (MJA) hruaitute a kâwm a, lungrual taka thawhho dan tur a sawipui.

B Lalchhanzova chuan, sorkar leh mipui inkarah inhriatpawh tawnna ṭha a awm a ṭul thu sawiin, chutiang atan chuan thuthar thehdarhtute an pawimawh thu MJA hruaitutre a hrilh a; theihtawp chhuahin ram tan thawhho a duh thu a sawi.

MJA hruaitute pawhin MJA dinhmun leh hmalakna te, an hmachhawp hrang hrangte leh sorkar hmalakna tura an beiseite an sawi a; sorkar laipui kal dan angin, advertisement/publicity atana sum dah ṭhin chu department hrang hrangah dah tawh loin, a hlawmin IPR department-ah dah ni se an duh thu an tarlang.

MJA hruaitute hmalakna tura an duh an sawite chu a ṭul anga a bawhzui tur thu IPR Minister chuan a sawi.

Inkawmhonaah hian Minister private secretary Remlalliana Hnamte-in B Lalchhanzova enkawl department-a hmalaknate a tarlang a; Revenue department-ah e-Ram kalpui mek a nih thu sawiin, "Online-in application thehluh theih a ni a, application thehluh aṭangin Minister a thlen thlengin a thehluttuin file awmna chin a hmu thei. File bo leh kal muang lutuk tihbo kan tum," a ti.

Remlalliana Hnamte chuan, Mizorama FCSCA department hnuaia retailer tinah digital weighing scale hman vek tawh a nih thu sawiin, "Hei hian buhfai bûk tling lo a tihbo beisei a ni," a ti a; kumina buhfai monsoon stock chu May thlaah chhêk ngah a ni tawh a, chuvang chuan kawng chhia karah buhfaiah harsatna a awm loh thu leh mipui pawh thlaphâng loa an awm theih thu a sawi.