Hna thar kan siam belh rualin thawktu ṭha siam belh a ngai - LESDE Minister

National Conference of Labour & Employment and Industry Ministers and Secretaries of State/UT Governments, ni hnih awh tur chu nimin khan Bharat Mandapam, New Delhi-ah ṭan a ni a; Labour, Employment, Skill Development & Entrepreneurship (LESDE) minister Lalnghinglova Hmar pawh telin, hna thar siam belh a nih rualin, thawktu ṭha siam belh a ngaih thu a sawi.

India rama Labour & Employment leh Industries minister leh secretary te inkhawmpui hi Ministry of Labour & Employment (MoLE) buatsaih a ni a, Union Labour & Employment minister Dr Mansukh Mandaviya leh minister of state Shobha Karandlaje ten an hmanpui a ni.

Lalnghinglova Hmar chuan, labour kaihhnawih ram pum huap thil sawiho tura state/UT-te nen inrâwnkhawmna buatsaih a ni chu pawimawh a tih thu sawiin, "Labour & Employment Ministry hmalakna kaltlanga hna thar kan siam belh rualin, hnathawktu ṭha siam belh a ngai a, chumi tur chuan chak zawkin skill development kalpui a ngai a ni," a ti.

Labour kaihhnawihah state/UT-te dinhmun a inang lo hle tih sawiin LESDE Minister chuan, "Keini’n a sâng bîa thil kan sawi laiin, a ṭhen chuan a nuai bi, a vaibelchhe bi ten an sawi. Kan hmalak theih chin leh kan mamawh a inchen lo," a ti a; dan hnuaiah state zawng zawng hrût rual vek loin, mamawhna mila her rem theih dan zawn a pawimawh thu a sawi.

Lalnghinglova Hmar chuan, Mizoram LESDE department kaltlangin Mizo ṭhalai eng emaw zat Japan leh ram dangah hna thawk turin an kal tawh tih a sawi a; ṭawng zir tura Delhi pan a ngai ṭhin chu a hautak avangin, Mizoram chhung emaw, hmarchhak state-ah ṭawng zirna hawng turin rawtna a thlen.

LESDE Minister chuan, Mizoramah private placement cgency-te awmze nei zawka kalpui tura sorkarin ruahmanna a neihte a sawi a, "India ram pawn mai ni loin, ram chhunga mahni state páwna hnathawkte awmze nei leh him zawka enkawlna tura inziah luhna buatsaih ṭul," a ti a; hemi kawnga Labour Ministry hmalakna a thlâwp thu a sawi.

National Labour Conference hi sawrkar laipui leh state/UT sawrkarte inkara thawhhona ṭha leh chak zawk a awm theihna’n buatsaih a ni a, MoLE hnuaia hmalakna hrang hrangte chak zawk leh awmze nei zawka kalpui dan tur ngaihtuahho a ni. Conference hi session hrang hrangah ṭhen niin, presentation bakah rawtna siam leh sawihona hun hawn zel a ni.

Conference ni khatnaah hian MoLE hnuaia Employees’ Provident Fund Organisation (EPFO) in a kalpui mek, kum hnih chhunga hna thar vaibelchhe 3.5 siam belhna tur scheme ‘Pradhan Mantri Viksit Bharat Rozgar Yojana (PM-VBRY)’ kalphung inhrilhfiahna leh sawihona neih a ni . He scheme hnuaiah hian hnathawk thar (hna la nei ngai lo) tan incentive Rs. 15,000dawn theihna leh, hnathawk tur rawih belhtu employer-te’n incentive an dawn theihna awmin, budget-ah cheng vbc 99,446 dah a ni. He scheme hian August 1, 2025 leh July 31, 2027 a hna siam tharte a huam ang.

In sak leh a kaihhnawih construction a thawk, ‘Building and Other Construction Workers (BOCW)’ te hmasawnna tur chungchang pawh ngaihtuahho a ni. Union Minister chuan BOCW hnathawkte tana hna zawnna portal ‘Digital Labour Chowk’ app bakah, online-a Labour Cess pek theihna tur software a tlangzarh nghal. ‘Shakti Niti 2025-National Labour & Employment Policy’ leh ‘Private Placement Agencies (Regulation) Act 2025’ duan mek (draft) te ennawna sawiho a ni.

National Labour & Employment Conference-ah hian LESDE Minister hi LESDE addl secretary Vivek Kumar Tripathi leh LESDE director John Ṭanpuiate'n an ṭawiawm.