Maumuala ram chinfel tawh mi 456-te Revenue Minister-in land pass a hlan

Land Revenue & Settlement (LRS) minister B Lalchhanzova chuan nimin khan Chaltlang ram chhung Maumuala hmuna ram nei, sorkarin a chinfel tawh mi 456 hnenah land pass a hlan.

B Lalchhanzova chuan, thil ṭha, felfai leh mumal zawk duhna vanga Maumuala ram neitu leh LRS department thawktute thawhhona zarah Maumual ram chu hlawhtling taka teh a nih thu a sawi a, "Buaina chinfel a nih theih nan ram neitute zingah inphahhnuai hreh lo te, tawlh hnun hreh lote leh mi inphal tak tak eng emaw zah awm chuan hna a tihsâwt phah hle. Tunah chuan ram pass lem a awm thei tawh lo turah kan ngai," a ti.

Ram vanga buaina tam zawk chu duhâmna vang a nih ṭhin thu sawiin Minister chuan, "Duhtâwk chin hriatna hian buaina tam tak a chinfel phah thei. Mahni thil neih kan hre chiang tur a ni a, uluk taka enkawl a pawimawh," a ti a; an ram vawn himna atan ramri hung ṭhin turin kal khawmte a chah.

LRS Minister chuan, sorkar chu mipui rawngbawl tur a nih thu sawiin, "LRS department pawh mipui tana dàwr nuam leh awlsam a nih theih nan kan insiamrem mek. Sawipuitu nei ve lo te, duhsaktu nei ve lo te, mi harsa leh hmangchang hre lo zawkte'n an chanvo dik tak an chan theih nan sorkar hnathawkte'n mawhphurhna pawi-mawh tak an nei a ni," a ti.

Hna sâwt zawka kalpui a nih theih nan Mizoram sorkarin tunlai thiamna hman ṭangkai tumin e-file a hman ṭan tawh thu sawiin B Lalchhanzova chuan, "LRS depatrment hnuaiah pawh hna chak zawka kalpui a nih theih nan e-Ram software kalpui a ni tawh," a ti a, e-Ram software chu mi tam zawkin bêl chiangin hmang ṭangkai se a duh thu a sawi.

PAMRA president Vanlalbiaa pawhin thu sawiin, "Remna vanga lo haw MNF hnam sipaite tana pek Maumualah hian sorkarin LSC-te min pe mah se, mahni ram awmna hre lo kan tam hle. Ram buai a tam bawk nen, min chinfelsak turin vawi tam tak sorkar ngen mah ila min tihfelsak thei lo. Sum leh paia harsatna vangtein mi tam takin an hralh a ngai ta a ni," a ti.

Kalphung thar mipui sorkar, ZPM-in kum hnih chhung leka Maumual ram a chingfel chu ropui an tih thu sawiin PAMRA President chuan, chief minister Lalduhoma leh LRS minister B Lalchhanzova te chungah an lawm takz et thu a sawi.

LRS director R Lalṭhazuala tarlan danin, Maumual ram hi May 23, 2022 khan teh ṭhat ṭan a ni a; survey nan hian kawng km 11.65-a thui laih niin, kawng laihna leh survey hna thawh nan Rs 41,37,872 hman a ni. Ram 831 teh ṭhat niin, land pass 456 pek chhuah theiha peih a ni a, land lease 13 leh land bank 61 teh zawh a ni bawk.

Maumual ramah hian house pass 829 aṭangin sorkar land bank leh land lease eng emaw zat a awm a; mimal ram 740 vel awmin, ram buai a tam avangin ram nei tan pawh kutthlak theih lohin hun rei tak a awm tawh a ni.