Tihdam hna hi profession a ni mai lo a, inpekna leh rawngbawlna a ni - Sapdanga

MFM School of Nursing chuan nimin khan an campus-ah zirlai tharte pualin Capping and Lamp Lighting Ceremony an buatsaih a, minister K Sapdanga'n a hmanpui. Minister chuan, tihdam hna chu profession a ni mai lo a, inpekna leh rawngbawlna a nih thu a sawi.

Capping and Lamp Lighting Ceremony hi Auxiliary Nursing & Midwifery (ANM)-ah vawi 17-na leh General Nursing & Midwifery (GNM)-ah vawi hnihna a ni a; Health Workers Training Institute, Kulikawna principal nursing officer Zothankimi Sailo-in zirlaite nurse lukhum a khumtir a, ANM leh GNM zir tharte'n bati chhiin, thutiam an sawi rual.

Minister K Sapdanga chuan, khawvelin profession pathum - sakhaw rawngbawl hna, taksa tihdam hna kleh thiam zirtir hnate a ngaihsan zual thu sawiin, "Khawvelin inang tlanga kan pawm tlan a ni a, eizawnna tih hian a phawk chhuak pha lo. Tihdam hna thawktute hi profesion tih mai pawh ni loin, inpekna leh rawngbawlna a ni," a ti.

Nurse zirlaite fuihna thu sawiin K Sapdanga chuan, nurse hna chu eizawnna ang ringawta ngai lo a, kohna anga ngai tur leh, nurse thutiam an chham tâkte hre reng a, a taka nunpui turin a chah a, "In thawhna hmun apiangah nurse zirna hmun danga mite aia in ṭha zawk tur a ni a, in danglam bik tur a ni," a ti a; an kut leh ṭawngkamte chu damlo tan damna tling a ni tih hre reng turin a chah.

K Sapdanga chuan, nu leh pate zingah an duhna hmuna an fate thawhtir tumin hma an la fo tih sawiin, "Thawhna hmun chungchangah nu leh pate'n harsatna kan siam duh em em mai a, nu leh pate'n insûm deuh a ṭha. Ṭhangtharte hi kan fel tawh, kan tuarfei, duat tehchiam kan ngai lo," a ti a; an fate tizuau zawnga awm lo tur te, an fate an zir chhuah hunah a no zawng ni loin, a daihzai záwnga mipui tana rawng an bâwl theih nan rilru pu turin zirlai nu leh pate a chah bawk.

MFM School of Nursing Capping and Lamp Lighting Ceremony-ah hian khuallian K Sapdanga'n Mizoram puma zirlai ti ṭhate hnenah Pi Thanpari Award a hlan a; khualzahawm Prof. Lalfamkimi, Trained Nurses Association of India president-in Profi-ciency Award a hlan a ni.

Principal Christina Zothanpuii tarlan danin, MFM School of Nursing hi kum 2009 din niin, ANM zirna a ni a, kum 2024 aṭangin GNM zirna hawn a ni. ANM-ah batch tinah 20 zel lak a ni a, GNM-ah zirlai 30 zel lak a ni thung. ANM zir chhuak mi 281 an awm tawh a, zir chhuak tawh zingah Japan-ah mi 11 leh Singapore-ah mi 20 an thawk mek a, missionary nurse 20 an awm bawk.