CPR tih dan press mite zirtir

Manipal Hospitals chuan November 10, Thawhṭanni zan khan Hotel Regency-ah Mizoram Journalists' Association (MJA) member-te Cardio Pulmonary Resuscitation (CPR) tih dan an zirtir a; an damdawi-ina journalist-te tana hamṭhatna an pekna tur card an tlangzarh bawk.

Chanchinbumite puala hun hmangtu Manipal Hospitals hi Kolkata EM By-pass-a mite an ni a; press mite chu CPR tih dan a takin an zirtir a ni. Dr Raja Mazumder chuan, heart attack (cardiac arrest)-te chu minute 30 chhungin damdawi-in thlenpui ngei a ṭha tih ni mah se, hmun hla zawka mite tan damdawi-in thlenpui mai theih a nih loh avangin mipuiin CPR tih dan an hriat chian a pawimawh thu a sawi.

Manipal Hospitals hian Mizorama chanchinbumite tan an damdawi-inah hamṭhatna an pe dawn a, chumi atana an buatsaih privilege card chu CPR tih dan zirnaah hian tlangzarhin, press mite hnenah an hlan nghal a ni.

Manipal Hospitals hotute chuan, India ramah damdawi-in 50 an nei a, Bengaluru bikah damdawi-in 10, Kolkata-ah damdawi-in panga, Delhi-ah damdawi-in pathum an nei tih an sawi a; India ram chhung hmun hrang hrangah CPR tih dan an zirtir tawh thu an sawi bawk.