SEIL National Integration Tour khâr

Higher and Technical Institute, Mizoram (HATIM), Lunglei conference hall-ah nimin khan 'Students Experience in Inter-State Living (SEIL) National Integration Tour to Mizoram' khârna hun hman a ni a, Lungleia Information & Public Relations officer C Lalhruaitluanga'n hmanpui.

SEIL National Integration Tour to Mizoram hi Akhil Bharatiya Vidyarthi Parishad (ABVP) bul tuma buatsaih a ni a, India ram state hrang hrang aṭangin zirlai pakua an rawn kal. November 7-11, 2025 chhungin Lawngtlai, Siaha leh Lunglei district-ahte hun hmangin, ram hruaitute leh district thuneitute, zirlai pawl leh tlawmngai pawlte nen an inkâwm a, hmun pawimawhte an fang bawk.

C Lalhruaitluanga chuan, SEIL Tour kaltlanga India ram hmun hrang hranga zirlaite'n hnam dangte zinga khawsa a, an nunphung leh hnam ziarâng zirna hun remchang an nei chu ṭha a tih thu leh, Mizoram rawn tlawhtu zirlaite'n tawnhriat ṭha leh ṭangkai tak an neih thar a beisei thu a sawi.

HATIM principal Dr R Lalnunthara pawhin thu sawiin, India ram chu hnam, ṭawng leh tih dan phung hrang hrang neite lungrual taka khawsakna ram a nihna chhawm nung zel turin zirlaite a chah a ni.