KHAWTHLIR

SEC 315-na ṭhu

Nimin khan Synod Office-a JM Lloyd Hall-ah Synod Executive Committee ṭhutkhawm vawi 315-na ṭan a ni a, November 13, 2025 thleng neih a ni ang. Ṭhutkhawm hi Synod moderator Rev. RC Lalnghakliana'n a kaihruai a, thu rêl tur 67 a awm. An rêl tur zingah home hrang hrangte nasa zawka ṭanpui chungchang, Asia chhimchhaka pastor rawngbawl dan tur kaihhruaina chungchang, Kristian Hla Bu ennawn chungchang leh Synod Pension Dan 2024 chungchangte a tel.

PMEGP training

Nimin khan MDTC Complex, Zemabawkah Prime Minister Employment Generation Programme (PMEGP) hnuaia loan late tana ni 10 awh tur training, Entrepreneurship Development Programme ṭan a ni a, Mizoram KVI Board chairman C Lalremliana'n a hawng. Training hi November 21, 2025 thleng neih tur niin, ni tin period li zel a awm dawn a, mithiamte'n thil pawimawhte an zirtir ṭhin dawn a ni.

UBI branch hawng

Union Bank of India (UBI)-in Mamit Branch an din thar chu nimin khan Mamit Sub-Headquarters YMA president Vanlalchhunga'n a hawng a, minister of state Prof. Lalnilawma'n Keifang Police Venga UBI Saitual Branch thar a hawng bawk. Minister chuan, bank chu loan lâk nan leh sum khawl nan a ṭangkai thu leh Mizo mipuite'n bank-ah sum khawl (savings) an uar a pawimawh thu a sawi. UBI chuan an branch thar pahnihah hian automated teller machine (ATM) siam nghal a ni.

Truck-in chîl hlum

November 10, Thawhṭanni zan dar 6:30 vel khan Sairangah Ramchuani (56), Zanlawn khua chu truck-in a chil a, ká chhawn lohin a thi. Ramchuani chîltu truck hi hmuh zui a ni lo.Thu dawn danin, Ramchuani hi truck-in a hmai a chîl chhiat avangin tu nge a nih hriat a ni mai lo a, Ramhlun North lam mi nia hriat a nih vang leh a fate pawhin an nu ang an tih avangin Ramhlun North Branch YMA hruaitute chu nimin zing khan Sairangah an kal. A hnuah Ramchuani a ni tih hriat chhuah a ni a, a ruang endik a nih hnuah an khua Zanlawnah lak a ni.