Aizawl Bazarpuia sa zawrhnaah bûkna endik

Legal Metrology enforcement leh Centre for Consumer Education, Mizoram hruaitute chuan November 11, Thawhlehni khan Aizawl Bazarpuia sa zawrhna hmunah sa bûkna atana an hmante a dik leh dik loh an enfiah.

Bazarpuia sa bûkna endik hi The Legal Metrology Act, 2009 ṭanchhana neih a ni a; vawksa, bawngsa, arsa, sangha zuartute'n an hralh tur an bûk lai endik a ni. Centre for Consumer Education hruaitute chuan, sa zuartute'n bûkna an hman chu a dik tlangpuia an hriat thu an tarlang.

Endiktute hian digital khawl hmangtute chu an khawlte thuneitute endiktir ṭhin turin an chah a; endikna lehkhate pawh kawl ṭha zel turin an hrilh bawk.

Sa bûkna hmanrua endiknaah hian Legal Metrology aṭangin inspector Lalramchhana hoin an tel a, Centre for Consumer Education aṭangin chairman Lallunghnema leh mi dang eng emaw zat an thawk chhuak a ni.

Lallunghnema chuan, hmun ṭhenkhatah sa zawrhte a bûk tling loa hralh chhuah a ni ṭhin tih sawiin, ṬTehna tling lo avangin consumer-te'n sum tam tak an sên belh ṭhin. A thlawnin mipuiin pawisa an sêng a, a thlawnin sum an chawi belh ṭhin a ni. Kristian ramah bûk leh teh dik lo hi a inhmeh lo. Sa zuartute hi tling leh fel taka sa bûka hralh ṭhin turin kan ngen a ni," a ti.