Lunglei Master Plan sawiho a ni

Lunglei Town Planning & Development Committee chuan nimin khan Lunglei Municipal Council (LMC) BoC Hall-ah Lunglei khawpuia ram awm dan leh mihring pun zel dante thlir chunga Lunglei khawpui ruangám leh hmasawn dan tur ruahmanna, 'Geographic Information System (GIS)-Based Lunglei Master Plan' an sawiho.

Ṭhutkhawmah hian LMC councillor te, LMC huam chhunga local council chairman-te leh sorkar department aiawhte an tel a; LMC vice chairman K Lalrinawma'n a kaihruai. AMRUT 2.0 hnuaia GIS-Based Master Plan siamtu tur (consultant) Spatial Decisions leh UDPA hnuaia Town & Country Planning Wing deputy director R Lalhmangaihzuali ten master plan kalpui dan tur an sawifiah.

Risk-Informed GIS-Based Master Plan for Lunglei Town hnuaiah hian kum 2045 thlirin Lunglei tan master plan duan a ni. Khawpui ṭhan zel dan tur leh hmasawnna hna thawhte felfai leh awmze nei taka kalpui a nih theih nan zirchianna (survey) leh data collection-te uluk taka kalpui a nih thu te, mipui leh department-te nena inrâwn chunga ruahmanna siam tum a nih thu leh, kumin chhungin Lungleia in tinah chhungkaw zirchianna (household survey) tih zawh hman tum a nih thute tarlan a ni.