YMA CCC ṭhutkhawm neih a ni

YMA rorelna sang ber dawttu Central Coordination Committee (CCC) chu nimin khan Central YMA Hall-ah an ṭhukhawm a; YMA Inkhawmpui Lian vawi 75-na, October 2025-a neiha rorelte bawhzui dan an thlirho.

YMA CCC ṭhutkhawm vawi 104-na hi CYMA president R Lalngheta'n a kaihruai a, CCC member 248 an tel. YMA Inkhawmpuilian vawi 75-na an thlir let bakah, inkhawmpui rorel bawhzui dante an thlirho a, Central Executive Committee bawhzui zel turin an dah.

CCC member-te chuan, tun hnaia Aizawla Red Bull Tlang Ruam neih dawna hnam dangin duhdah taka Cheraw an kân chu Mizo hnam lâm tihbawrhbânna a nih thu leh tun hnuah thleng tawh lo se an duh thu an sawi a ni.