LADC inthlan atana inbuatsaih dan thlir

Lai Autonomous District Council (LADC) hnuaia 12th Member of District Council (MDC) inthlanpui December 3, 2025-a neih tura inbuatsaihna kal zelah nimin khan district election officer Donny Lalruatsanga, bawrhsap kaihhruaiin Lawngtlai District Level Standing Committee an ṭhukhawm.

Tarlan danin, LADC MDC inthlanpui atan hian returning officer leh assistant returning officer pathum ve ve, sector officer 17 leh nodal officer 14 ruat a ni tawh. Polling station 111 awmin, Pangkhuaah auxiliary polling station siam a ni dawn a, voter pakhat awmna Hmawngbuchhuahah chuan home voting tihtir a ni ang.

Bungtlang South-II, Saizawh East leh Lungzarhṭum polling station chu hmeichhia vekin an enkawl, pink polling station atana ruahman a ni a; vote chhiarna atan Lawngtlai College ruahman a ni.

DEO Donny Lalruatsanga chuan, inthlanna felfai leh muanawm a awm theih nan theihtawp chhuah turin kal khawmte a sáwm a, "Vote neite'n an duh ang ngei an vote theih nan ruahmanna siam a ni a, kan ruahmannate hi ṭha taka kalpui a nih theih nan NGO leh political party ten theihtawp min chhuahpui a ngai a ni," a ti.

Mipuiin an aiawh ram hruaitu tur an thlannaah Election official-te thawhpui thiam a ṭul thu sawiin DEO chuan, "Inthlan chungchanga thuchhuah apiangte zawm thiam a pawimawh. Ralmuang leh zalen taka inthlanna nei turin theihtawp chhuah tlan a ngai a, a bik takin sum leh pai hmanga inthlêm te, invau te ti loin, zalen taka inthlan a pawimawh a ni," a ti a; MPF-te chu theihtawp chhuah zel turin a ngen.

Lawngtlai SP PC Lalchunglura chuan, LADC inthlanpui neih tura dan leh thupek kenkawh dan tur a sawi a; sector police leh polling duty turte ruat mek an nih thu te, police lam indaih lohna avangin dil belh a nih thu leh, 3rd IR leh 2nd MAP aṭanga pek an nih thute a tarlang.