MSMC-a inziak lut lo tan damlo en phal lo

Lunglei district bawrhsap Navneet Mann chuan thupek chhuahin, Mizoram State Medical Council (MSMC)-a inziak lut lo doctor-te'n Mizoramah damlo an en theih loh thu a tarlang.

Navneet Mann chuan, MSMC aṭanga hriattirna hmuh a nih angin Mizoram páwn aṭanga doctor/damdawi lama thiamna nei ṭhenkhatte'n MSMC-a inziak lut hmasa loin Mizoramah damlo an en ṭhin tih hriat a nih thu leh chutiang chu phal loh a nih thu a tarlang a, "Mizoram Medical Council Act, 2010 leh National Medical Commission Act, 2019 Section 34 hnuaiah hrem theih an ni. He dan hian mi tu pawh, khawi state-ah pawh an thiamna/damlo enkawlna hmanruate anmahni chenna state medical council-a inziah luh hmasak loh chuan hman phal a ni lo," a ti.

LUNGLEI BAWRHSAP THUCHHUAK
* MSMC-a inziak lut lote'n Mizoramah damlo a en thei lo.
* Private hospital, nursing home, charitable institution, NGO leh non-government health facility ten State Medical Council-a inziak lut lo doctor-te chhawr/hna pek theih a ni lo.
* Mi tu pawhin doctor a râwn dawn a nih chuan MSMC-ah a inziak lut em tih a hre chiang phawt tur a ni.
* Medical camp emaw, damlote tana ṭha tura hmalakna buatsaih a nihin MSMC chuan hun rei lo tê atan phalna a pe ṭhin a, MSMC phalna la loa hmalak a niha hriat chhuah a nih chuan hrem theih a ni.