KHAWTHLIR

KṬP-in thisen pe

KṬP, Armed Veng East Branch chuan nimin khan an kohhran hall-ah thisen pek rûnpui an huaihawt a, Civil Hospital, Aizawl tan thisen unit 30 an pe a, petute mipa 23 leh hmeichhia pasarih an ni.

Kawng khâr dawn

PHE department chuan Chaltlang Dawrkawn leh Bawngkawn inkar kawngah pipe an phûm dawn a; hei vang hian Traffic SP C Vanlalvena chuan lirthei khalhtute tana hriat tur a tichhuak. Traffic SP tarlan danin, vawiin aṭanga December 31, 2025 thlengin zan dar 10 aṭanga zing dar 6 inkarah Chaltlang-Bawngkawn kawng khâr ṭhin a ni ang.

MDTP inhrilhfiah

Aizawl district bawrhsap Lalhriatpuia kaihhruaiin nimin khan Planning conference hall-ah District Planning Committee (DPC) an ṭhukhawm a, minister pahnih - Lalthansanga leh Dr Vanlalthlana ten an telpui. Mizoram District Transformation Programme (MDTP) din chhan, thil tum leh hmalak dan turte inhrilhfiah a ni a; MDTP hnuaia baseline profile leh District Catalytic Action Plan (DCAP) siam dan turte inzirtir a ni bawk.

Vawk lak luh khap

Kolasib bawrhsap Robert C Lalhmangaiha chuan thupek tichhuakin, district pawn lam aṭangin Kolasib district chhungah vawk leh vawksa, frozen pork, vawksa rêp leh vawksa aṭanga siam reng ereng lak luh khap a nih thu a puang. Bawrhsap chuan, Kolasib district-a African Swine Fever lêngin ziaawm lam pan mah se, khapna thupek chhuah a la ngaih thu a tarlang.

Kuhva phurh khap

Aizawl district magistrate Lalhriatpuia chuan thupek chhuahin, sorkar hriatpuina tel loa kuhva phurh/tawlh leh mahni remhriat dana dahṭhatna kudam siam chu dan kalh a nih avangin Aizawl district-ah khap a nih thu a puang. Thupek bawhchhiate chu dan anga hrem theih an nih thu a tarlang bawk.