Minister-in Chite Veng khelmual a hawng

UDPA minister K Sapdanga chuan nimin khan Aizawl Smart City Ltd. hmalaknaa din, Chite Veng khelmual (playground) a hawng a, "Sorkar hmasaah leh tun sorkarah Mizoramin Sports Minister ṭha tak kan nei hi kan vannei hle a ni," a ti.

K Sapdanga chuan, khawtlang hruaitute leh Sports department-te thawhhona a ṭhat avangin Chite khelmual din a nih thu sawiin,, "Sorkar hmasaah leh tun sorkarah Mizoramin Sports Minister ṭha tak kan nei hi kan vannei hle. Mizote tan sport hi eizawnna tlak a ni tih a takin kan hmu chho zel a ni," a ti a; Mizo infiammite'n national level medal an dawng ṭhin chu infrastructure dintu department tan hlawhtlinna ropui tak a nih thu a sawi.

UDPA department-in khawpui hmasawnna turin theihtawp a chhuah zel dawn thu sawiin Minister chuan, "Nasa lehzualin sports infrastructure-te tihhmasawn zel tum a ni," a ti a; ṭhalaite chu eizawnna tlak thiamna paw chhuak deuh deuh turin duhsakna a hlan.

Chite Playground siam nan hian cheng vbc 9.85 sen a ni a, North East Consultancy Services-in November 25, 2022 khan siam ṭanin, August 27, 2024-ah an siam zo. Khelmual enkawl turin Chite Local Council, YMA, MUP, MHIP aiawhte telna Field Management Committee din a ni a, khelmual aṭanga sum hmuhte chu veng chhungin 70% changin, sorkarah 30% an chhung lut ṭhin dawn a ni.