Mizoramah Tribal Pride Day hman a ni

India ramin zalenna a hmuh theih nana tribal hruaitu Bhagwan Birsa Munda pian champha vawi 150-na pualin nimin khan Mizoramah 'Janjatiya Gaurav Varsh - Tribal Pride Day' hman a ni a; Raj Bhavan-a hun hman chu Governor Gen. Dr Vijay Kumar Singh-a'n a hmanpui.

Planning department bultuma Raj Bhavan circular lawn-a Janjatiya Gaurav Varsh - Tribal Pride Day hmannaah hian Mizo zinga British rorelna dodaltu pathum - Nikuala, Lianphunga leh Khuangchera te ram tana an inhlanna hriatreng nan Governor-in an thlalak bulah zahna pangpar a dah.

Gen. VK Singh chuan, Janjatiya Gaurav Varsh puala hun hman chuan India rama tribal-te a chawimawi a, an hlawhtlinna, kalphung inhlan chhawn zelna leh hmasawnnate a chawilar tih a sawi a, "India rama chengte hi tribal kaihhnawih nei vek kan ni a, a ṭhenin tribal hnam ziarâng leh nunphung an kalsan tawh laiin, a ṭhenin an la chhawm nung zel a, Mizote hi a la kalpui zelte zinga mi kan ni," a ti.

India ramin zalenna a neih theih nan sakhua leh hnam tih bik awm loin theihtawp chhuaha hmalak a nih thu sawiin Larsap chuan, "Páwn lam awpbehna laka him nan Mizoram pawhin theihtawp a chhuah a ni," a ti a; Prime Minister-in India ram hmun dangte ang bawka tribal-te chenna zawng zawngin hmasawnna an hmuh theih nan zirna, hriselna leh a dangahte scheme ṭangkai tak tak a duan thu a sawi.

Tribal Pride Day hmannah hian tribal hnam zinga British awpbehna aṭanga zalên tura beitu mi huaisente chawimawina hun hman a ni a; India ram puma tribal hruaitu hriat hlawh, Ulgulan Movement kalpuitu Birsa Munda, Jharkhand bakah, Mizo zinga British rorelna dodaltu Nikuala, Lianphunga leh Khuangchera te thlalak pho chhuah a ni.

Mizo Cultural Organisation-te'n Mizo hnam lâm entirin, tribal hnam ziarâng leh nunphungte an tarlang a; Tribal Freedom Fighter Wall siam niin kut themthiamte kutchhuak (craft, handloom) leh food stall-te siam a nih bakah innovation exhibition siam a ni. Raj Bhavan-a Tribal Pride Day hmanna hi vawiinah mipui tlawh theih turin hawn chhunzawm a ni ang.