All India Cooperative Week hman a ni

Nimin khan Vanapa Hall-ah All India Cooperative Week vawi 72-na hman a ni a; chief minister Lalduhoma'n hmanpuiin, Multi-purpose Primary Agricultural Credit Societies (MPACS) ṭha thlan chhuah pathum hnenah lawmman a hlan.

Chief Minister chuan, sorkarin society-te leh MSME-te siam chhuah thilte a ngaihlu tih sawiin, a, sorkar office bungrua leh hmanruate thlak a ṭul hunah kan ram siam chhuah, Mizo kut chhuakte ngeia thlak zel tum tur a ni, tiin thuchhuah kan siam," a ti a; February 25, 2025 khan 'The Mizoram Procurement Prefe-rence Policy for Small & Medium Enterprises 2025' chu gazette-a tihchhuah a nih thu a sawi.

MULCO, MAHCO leh MAHFED te chu hma hruai tura chahin Lalduhoma chuan, "Huapzo hmalakna, member zawng zawngte phûr taka kan kal theihna i uar ang u. MULCO hian in tina lut thei thar chhuah neih tum tlat se, MAHCO Mizo puan hi India ram pumpui hriat khawpa dinchhuah tum ila, MAHFED pawhin kan rama thar thei leh thlai pho chhuah tur tam tak kan neih bakah, mipui tam zawkte hi kan thawhpui theih eizawngtute an ni tih hriain hlawhtling ngei tur hmalakna i kalpui ang u," a ti.

CM Lalduhoma chuan, member-te'n hlawkna an hmuh theihna tura inthuruala hmalakna leh inlaichinna ṭha nei chunga thawhhona chu cooperative nihphung a nih thu sawiin, "Hetiang hmalakna kalpui tur chuan Mizote tluka ṭha hi khawvel ram dangah an awmin a rinawm loh a, pi pute hun ata khawsakho thiam tak, thawhho thiam, mimal tana hna harsa leh lian tham tinreng hnatlanga thawk ṭhin kan ni," a ti a; eizawnna lamah pawh cooperative kaltlanga thawhho theih a nih thu a sawi.

Week hawnna inkhawm hi Cooperative Societies registrar John LT Sanga'n a kaihruai a, Cooperarion minister PC Vanlalruata pawhin thu a sawi.

Mizoramah primary cooperative society 1,500 chuang leh state level cooperative federation/union 13 an awm mek a; MPACS ṭha zual pathumte chu - Khanpui MPACS, Tualte MPACS leh Saipum MPACS te an ni.