Aizawla tui pek tihhmasawnna tur project PHE Minister-in a hawng

Aizawl khawpuia tui supply tihhmasawnna tura duan, 'Strengthening of Aizawl Water Supply Scheme' project chu November 13, Ningani zan khan PHE minister Prof. Lalnilawma'n Chaltlang Dawrkawnah a hawng. Minister chuan, ṭhál laia tui pump chhuah harsa ṭhin tihziaawm nan Tlawng lui tui khuahna tihsàn a nih dawn thu leh tui dah khawlna siam belh a nih dawn thu a sawi.

Strengthening of Aizawl Water Supply Scheme project hi SASCI Part-I hnuaia hmalakna niin, cheng vbc 47.8 senna tur a ni a; PHE Aizawl WATSAN Circle hnuaia division pathumte'n an thawk dawn a ni.

PHE Minister chuan, project-in tum chu Aizawl khawpuiin tui hnianghnar zawk a neih theihna tura hmalak a nih thu sawiin, "Tlawng lui tui kám zel vanga ṭhál laia tui pump chhuah harsa ṭhin tihziaawm nan tui khuahna tihsàn a ni dawn a, tui dah khawlna pawh siam belh a ni ang. Aizawl veng hrang hranga chak zawka tui sem a nih theih nan hmalakna a nih dawn bakah, tui pump-na hmun leh pipeline-te tihchangtlun a ni dawn," a ti.

Aizawla tui pipe phum tur chu zan dar 10 aṭanga zing dar 6 inkarah thawh ṭhin a nih dawn thu sawiin Minister chuan, "Ṭha taka hna thawh a nih a, zawh thuai a nih theih nan leh department hmalaknate hrethiam a, thawktute dawngsawng thiam turin mi tin ka sáwm," a ti a; pipe phûmnaah kawngpui laih chhiat a ngaih châng a awm tih sawiin, hrethiam turin mipui a ngen.

Prof. Lalnilawma chuan, tui hnianghnar zawkna turin kawng hrang hrangin PHE department-in hma a lak thu leh, Hualtu aṭanga lei hîpna hmanga tui lak pawhin Mualpui a haw thlen tawh thu a sawi bawk.

Strengthening of Aizawl Water Supply Scheme project hawnnaah hian PHE engineer-in-chief Zodinthari'n PHE department hmalak dan tur hrang hrangte a sawi a; AMC executive corporator Lalringliana bakah, Aizawl City Joint Local Council hruaitute'n thu an sawi bawk a ni.

STRENGTHENING OF AIZAWL WATER SUPPLY SCHEME
* Greater Aizawl Water Supply Phase-II tuikhuahna awm sa chu RCC-in tihsàn a ni dawn a, tui litre nuai 900 a khuap belh thei dawn.
* Commmunication, monitoring leh control system tihchangtlun nan khawl changkang tak tak hman a ni a, tui quality leh flow level monitoring lamah nasa takin hmasawnna a awm dawn.
* Fûr laia Tlawng tui nu nasa lutuk tihziaawm nan pre-settling tank sak a ni dawn a, submersible pump set thar pathum vuah a ni bawk ang.
* Raw-pumping station sak thar niin, pumping main vuah a ni dawn.
* GAWSS Phase-II intake weir aṭangin direct-a Phase-I jackwell-a tui luhna tur pipeline dah tur a ni a, fûr laia Serlui tui nu zual paihna turin Serlui Gravity Main-ah scour line dah a ni ang.
* Lungleng-Samtlang-Chhimphei lama tui pekna pipe chu ramhnuaia kal a nih avanga pipe a chhiat chânga siam buaithlak leh harsa ṭhinte sutkian nan Samtlang kawngah GI pipe (mm200, Rm 2991) phum a ni dawn.
* Tuikhuahtlang-Chhimphei khaw hrang hranga tui pekna pipe a hlui tawh, DI pipe chu ERW 250mm - 3,820 Rm hmangin thlak a ni ang.
* Venghnuaiah tui dahkhawlna tur litre nuai 5 dawng zonal tank leh Melthumah litre nuai 2.5 dawng tanky siam a ni dawn.
* Laipuitlang tuizem leh Durtlang booster inkar, Zemabawk leh Ṭhuampul zonal tank-te leh Berawtlang feeder siam a ni dawn.
* Laipuitlang tuizem aṭangin pipe pathum (323.9 mm dia ERW; 200 mm dia GI(H) leh 150 mm dia GI-H)-te a chhuak ang.
* Pipe 323.9mm (13 inch) dia 3,700 Rm-a thui hian Durtlang booster-ah tui a pe ang.
* Pipe 200mm (8 inch) dia 8,000 Rm-a thui hian Zemabawk zonal tank-ah tui a pe ang.
* Pipe 150mm (6 inch) dia 5,300 Rm-a thui hian Ṭhuampui zonal tank-ah tui a pe dawn.
* Zemabawk line 200mm aṭang hian 150 mm dia GI(H) pipe, 1,800 Rm-a thuiin Berawtlang zonal tank-ah tui pek a ni dawn.
* Falkland zonal tank-ah tuizem litre nuai 3 dawng sak a ni dawn a, tui pek luhna tur pipeline siam a ni ang.