Minister-in sikul 12 tan Skill Lab a hawng

Labour, Employment, Skill Development & Entrepreneurship (LESDE) minister Lalnghinglova Hmar chuan nimin khan KM High School aṭangin sorkar sikul 12-a zirlaite'n zirna leh information technology (IT) lama thiamna an neih theihna tur 'Skill Lab' a hawng.

Skill Lab dinna sikul 12 hnenah hian computer 10 ṭheuh bakah, printer leh projector pakhat ṭheuh pek a ni a; sikul tinah hian Skill Lab siam nan room awm sate thawm ṭhat a ni.

Lalnghinglova Hmar chuan, thiamna inher danglam zel milin zirlaite an inzir a pawimawh thu sawiin, "Khawvelin hma a sawn zel a, thiamna thar lo chhuakte thiam ve lo chu kalsan an ni dawn. Skill Lab hawn thar hi zirlaite'n IT an hmelhriata an thiam ve theihna tur a ni a, lehkha thiamna hmanga hna hmuh vek theih a nih loh avangin eizawnna tlaka thiamthil (skill) neih a pawimawh," a ti a; thiamna hmang ṭangkaia inzir zel turin zirlaite a fuih.

LESDE department leh School Education department chuan SANKALP scheme hnuaiah district 11-a sorkar sikul 12-ah skill lab a din a, zirlai 2,413 velin an chhawr beisei a ni.

Skill lab dinnate chu - Aizawlah KM H/S leh JL H/S, Lunglei H/S, GM H/S Champhai, Hnahthial H/S, Region H/S Lawngtlai, Kawlkulh H/S, Kawnpui H/S, Serchhip H/S, Keifang H/S, Siaha H/S leh Mamit H/S te a ni.