CYMA leh kawng siamtute inkâwm

Central YMA hruaitute leh Mizorama national highway enkawltu NHIDCL leh an hnuaia Vairengte leh Sairang inkar kawng siamtu contractor hotute chu nimin khan CYMA Office-ah an inkâwm a; CYMA hruaitute chuan, Vairengte-Sairang kawng siam mek chu an vil reng dawn thu an hrilh.

CYMA hruaitute chuan Vairengte leh Sairang inkar kawng chu November 8, 2025 khan an enfiah thu sawiin, kawng siam mek chu vil reng an tum thu an hrilh a; December chawlhkar hmasa berah tlawh nawn leh a tum thu leh, kawng siam dan uluk zawka enfiah an tum an sawi.

NHIDCL hnuaia kawng siamtu contractor-te chuan, Kolasib leh Reng-tekawn inkara kawng chhe lai zual chu December 20, 2025 velah blacktop ṭan hman an tum thu an sawi a; Khamrang leh Buichali inkar pawh December 20 velah blacktop ṭan an tum thu an sawi bawk.

Inkawmhonaah hian CYMA lam aṭangin president R Lalngheta leh hruaitu dangte an tel a; NHIDCL executive director Adelbert Susngi leh a hotu dangte leh, contractor pathum an tel.