Party-te'n thlan tlin tâk an lawmpui

Mizorama political party hrang hrang - ZPM, Congress, BJP leh PC party-te chuan thuchhuah siamin, Dampa by-election-a thlan tlin tak MNF candidate Dr R Lal-thangliana an lawmpui thu an tarlang.

Rorel lai ZPM chuan, "Dr R Lalthangliana kan lawmpui a, MLA ṭha tak ni tur leh Dampa bial hmasawnna tura theihtawp chhuaha thawk turin duhsakna kan hlan," an ti a; tling zo ta lote an tawrhpui thu an sawi.

ZPM chuan, an candidate Vanlalsailova chu tling zo ta lo mah se, kum 2023 inthlanpui aiin vote a hmuh tam zawk avangin hma an sawn thu an tarlang a; an candidate tana theihtawp chhuahtute leh vote-tute chungan an lawm thu sawiin, "Campaign laiin kan campaigner-te zingah mi rilru tina zawng emaw, harsatna thlen emaw an awm a nih chuan ngaihdam kan dil," an ti.

Mizoram Pradesh Congress Committee (MPCC) chuan, "MLA atan thlan tlin Dr R Lalthangliana kan lawmpui. Dampa bial mipui, INC candidate Pu John Rotluangliana vote petute zawng zawng chungah thinlung takin lawmthu kan sawi," an ti a; by-election tluang taka zawh a ni chu lawmawm an tih thu an tarlang.

BJP leh Peoples Conference party pawhin thlan tlin tak an lawmpui thu an sawi rualin, an candidate vote-tute chungah an lawm thu an tarlang a ni.