CM-in Bible House thar a hawng

Chief minister Lalduhoma chuan nimin khan Bible Society of India (BSI) Aizawl Auxiliary building, Bible House thar a hawng a; Zo fate'n chanchin ṭha meichher êng taka an chhit a ṭul thu a sawi.

Lalduhoma chuan, Mizote chu Pathianin a rawngbawl turin a thlang tih hriat theih a nih thu sawiin, "Missionary-te an rawn awm ṭan aṭanga kum 15 chhung velin Zo hnahthlak hnam hlawm lian zawng zawng zingah chanchin ṭha a thleng deuh vek a, kum 50 chhungin a hnam pumin Kristian kan ni. Kan ram hi han thlir ila, sakhaw lian pathumin min hual a, chu'ng mite karah chuan Zo fate hian chanchin ṭha meichher hi êng taka kan chhit a ngai a ni," a ti.

Bible House ṭhin chu kum 2016 khan a dinna lei a tlak hniam avangin ṭhiah a ni a, a hmun chu tuna Bible House thar awmna nen BSI leh sorkarin an inthleng a, sorkarin zangnadawmna cheng nuai 407 a pe. Bible House thar hi sorkarin sum a pek BSI member-te thawh khawm nen cheng nuai 1,100 senga sak a ni a, a hnuah sorkarin cheng nuai 50 a pek belh leh bawk.

BSI Aizawl Auxiliary hnuaiah hian branch 55 awmin, Mizoram, Tripura leh Barak Valley-a district pathum a huam a, kohhran hrang hrang 30 an thawkho mek a ni.