KHAWTHLIR

Tual ui enkawl dan tur sawiho

Chief secretary Khilli Ram Meena hoin nimin khan sorkar hotute'n tun hnaia Supreme Court-in tual ui (straydog) chungchanga thupek a chhuah bawhzui dan tur an rel. Tarlan danin, Supreme Court chuan August 22, 2025 khan tual ui chungchangah thuchhuah a siam chu siamremin, tual ui man khawmte enkawl zui dan tur chungchangah thupek thar a tichhuak a ni.

LADC-ah mi 79-in nomination thehlut

Lai Autonomous District Council inthlanpui December 3, 2025-a neiha chuh tumte tan nimin chawhnu dar 3 thleng khan hming pek luh theih a ni a; nimin tlai dar 3 thleng khan MDC seat 25 chuh turin mi 79-in nomination an thehlut a ni.

CYMA-in kâwm

Central YMA hruaitute chuan nimin khan CYMA pisaah Barak Valley Cement Limited (Valley Strong) hotute an kâwm a; Mizorama rêl a luh hnuah pawh cement man la tlawm thei lo chungchang sawipuiin, hmalakna kalpui dan tur ngaihtuah ni se, tiin thu an dah.

Tuirini khuah remti

Tuirini Hydel Project-in a chhehvel khaw mipui a nghawng dan tur zirchian mekah November 13, Ningani khan Seling YMA Rûnah Seling VC kaihhruaiin mipui ngaihdan lak a ni a, project chungchang inhrilhfiah nghal a ni. Sawihona leh zawhna leh chhanna hun hman a ni a, Seling mipui kal khawm zinga a tam zawk chuan tuikhuah an remti. Project hi New Development Bank, Shanghai aṭanga pûk cheng vbc 660 chuang hmanga thawh tur a ni a, pawisa pûk hi sorkar laipuiin 80% tumin, state sorkarin 20% a tum ang.

NLSA scheme zirho

Mizoram State Legal Services Authority leh All Mizoram Elected Women Representatives chuan nimin khan Lunglei Convention Centre-ah Lunglei district-a rorel tura thlan tlin hmeichhiate tan National Legal Services Authority Scheme zirhona leh intuaitharna an buatsaih. He hun hi Lunglei High Powered Committee vice chairman V Malsawmtluanga, MLA leh Lunglei Municipal Council vice chairman K Lalrinawma ten an hmanpui a ni.