Aizawl khawpuiah Christmas carol leh costume parade buatsaih tum a ni - Tourism minister

Tourism minister Lalnghinglova Hmar chuan, Aizawlah Winter Festival laiin Christmas carol leh costume parade buatsaih tum a nih thu leh khualzin hîp thei buatsaih zel tum a nih thu a sawi.

November 15, 2025-a Leitlangpui Music Festival khârna a hmanpuinaah Lalnghinglova Hmar chuan, Leitlangpui Music Festival chu ropui lehzualin buatsaih zel tum a nih thu a sawi a; tourism-in a tum chu Mizoram hmun tina mite intlawh tawn a, hunpui leh hun bil (event) buatsaih a, chumi kaltlanga tualchhung mite iptea sum lut hmanga ram eibar dinhmun (economy) chawikan a nih thu sawiin, "Event ṭha, khualzin hîp thei buatsaih zel tum a ni," a ti.

Lalnghinglova Hmar chuan, December 15-23, 2025 chhungin Aizawlah Winter Festival buatsaih tum nih thu sawiin Lalnghinglova chuan, "Krismas lam hawia hun duan a, Christmas carol leh costume parade-te buatsaih tum a ni. Mizoramah kum hlui thlaha tourist hîp thei turin ruahmanna siam a ni a, December 31-ah ṭhalaite tan Sakawrhmuituai Sunset programme buatsaih a ni dawn," a ti a; khualzin tam zawk hîp luh a nih theih nan Mizo thil ngaisang a, lawm a, chawi lar zel turin ṭhalaite a chah.

Tourism Minister chuan, Lunglei chu Mizoram rimawia sûlsutu a nih thu sawiin, Leitlangpui Music Festival pawh a vul zel dawn thu a sawi a, "Mizo leh Mizo kan inlâwm a, Mizo hla saa kan zai ṭhup ṭhup te, kan hla, kan zaithiam leh rimawi tum thiamte kan ngaisangte hi rimawi kûtpui tihlawhtlingtu a ni a, hei hi Mizoram tourism-in ṭhang zel tura a mamawh a ni," a ti.

Leitlangpui Music Festival tawp zanah hian Lunglei High Powered Committee vice chairman V Malsawmtluanga, MLA leh Lunglei West bialtu MLA T Lalhlimpuia te pawhin thu an sawi.

Sorkar thuchhuah tarlan danin, Leitlangpui Music Festival 2025 hi Ministry of Tourism aṭanga hmuh cheng nuai 25 leh Mizoram sorkar aṭanga hmuh cheng nuai 25 bakah, sumdawng leh agency hrang hrang aṭanga puihna (sponsor) hmuh hmanga buatsaih a ni. Zaithiam hrang hrangte'n hun an hmang a, exhibition leh thil zawrhna stall 100 vel hawn a ni.