Kakichhuahah tuihri vangin mi 6 thi tawh

Lawngtlai district-a Kakichhuah leh Hruitezawl khuaa tuihri (cholera) nia hriat a lêng mek a, Kakichhuahah mi paruk an thi tawh a; Lawngtlai bawrhsap Donny Lalruatsanga chuan nimin khan Kakichhuah a tlawh. Khaw pahnih hi tlawhpawh theih loh hmun (containment area)-ah puan mek a ni.

Kakichhuah leh Hruitezawl khuaa tuihri lêng chungchang hi November 15, Inrinni khan Lawngtlai bawrhsap Donny Lalruatsanga'n a pisaah thuthar thehdarhtute a hrilhfiah a; sorkarin theihtawp a chhuah thu sawiin, "Kakichhuah leh Hruitezawl hi containment area-ah puan a ni tawh a, December 1, 2025-ah LADC election team tirh chhuah a ngaih tawh dawn avangin free zone-a puang hman turin hmalak mek a ni," a ti.

Lawngtlai DC chuan, Lawngtlaia Chief Medical Officer kaihhruaina hnuaiah medical team-te'n Kakichhuah leh Hruitezawl an vil reng bakah, World Health Organisation (WHO) medical team leh Doctor without Borders te an luh tawh thu a sawi a, "Kar khat chhung chu uluk lehzuala enkawl a ni dawn a, a ṭul dan azirin sorkarah ṭanpuina lian zawk pawh ngen a ni ang," a ti a; ORS, IV drip, tui tihthianghlimna leh damdawi ṭulte pek a nih thu a sawi.

Kakichhuah hi Lawngtlai DC Donny Lalruatsanga chuan nimin khan tlawhin, sorkar hmalaknate leh an dinhmun a enfiah a; hri lêng vanga mi paruk lai an thi chu pawi a tih thu sawiin, hri lêng a darh zel loh nan hmalak mek a nih thu a sawi.

Lawngtlai DC chuan, Kakichhuah chu containment area a nih angin, thuawih taka awm turin mipui a chah a, "Thla hnih chhung Myanmar lam nen inkalpawh khap tlat a ni a, inlênpawh pawh khap tlat a ni. Hengte hi ṭha taka zawm a pawimawh. Ramri pêla kal lui an awm chuan na taka hrem an ni ang," a ti a; medical team-in an ṭhutchilh reng avangin thlaphâng lo turin mipui a chah.

Health worker ZD Vanlalhruaia sawi danin, Kakichhuah hi medical team-in November ni 11 aṭangin an awm chilh a, hri vei mi 90 an buaipui tawh a, mi pali an enkawl mek. Inlênpawh lo tura ṭan lak a ngaih thu te, ek-in nei mumal lo an la tam chu an harsatna a nih thu te, thi zinga a tam zawk chu damdawi ei ṭha lo an nih thute a sawi.

Lawngtlai CMO Dr Lalmuanawma Jongte tarlan danin, November 4, 2025 khan hri vanga thi hmasa ber a thi a, November 11, 2025 khan hri a len thu an dawng. Tun thlengin mi paruk an thi tawh a, chungte chu ṭhenawm ram aṭanga ráltlân pathum leh khawtual mi pathum an ni.

Damlo 71 endik tawh zingah a tam zawk chu an na lutuk lo a; hri hi Salachhuah (Myarmar) lam aṭanga rawn lut nia ngaih a ni a, ZMCH-ah tui sample endik mek a ni.