Live Museum buatsaih zui zel dawn

Art & Culture department chuan November 15, Inrinni khan Falkawna Zokhua (Mizo Typical Village)-ah Live Museum an buatsaih leh a, mipui ṭhahnem takin an chhim. Live Museum hi March 2026 thleng Inrinni apiangin buatsaih a ni dawn.

Art & Culture department hotute hnen aṭanga Vanglaini thudawn danin, hmânlai Mizo nun a taka entirna, live museum hi October 25, 2025 khan hawn a ni a, November 15, Inrinni thleng Inrinni apianga buatsaih tura ruahman ni mah se, mipuiin an hlut avangin March 2026 thleng Inrinni apiangin buatsaih chhunzawm tum a ni.

Local tourism-ah Mizoram mipui an harh thar zel avang leh Mizoram páwn aṭanga khualzin rawn lut an pun zel avangin Art & Culture department chuan Mizo hnam nunphung leh khawsak dan chawi lâr nan Live Museum an buatsaih a ni.

Live Museum hi Inrinni apiangin buatsaih a ni dawn a, luh man Rs 100 a ni. Live museum show entir ṭhin chu hun hnihah ṭhen a ni a; first segment chhun dar 12:00 - 1:30 inkarah niin, second segment chu chawhnu dar 2:00 - 3:30 inkarah a ni. Tun hmaa Mizo nun dan hrang hrang, hnam lâm leh zai, Mizo infiamna, Mizo chaw leh thil dangte entir a ni ṭhin.