Hall enkawl dan tura inremna ziak

Sports & Youth Services department leh Lunglei District Basketball Association (LDBBA) chuan Sazaikawn Multipurpose Hall enkawl dan turah November 15, Inrinni khan Lunglei Circuit House-ah inremna, memorandum of agreement (MoA) an ziak a; SYS minister Lalnghinglova Hmar-in a hmanpui.

Lalnghinglova Hmar chuan, Sazaikawn Multipurpose Indoor Stadium chu kum 2018-a hawn tawh ni mah se, luah loh leh enkawl zui loha a awm reng avangin a tlabal nasa tih sawiin, "July 2, 2024 khan bialtu MLA Pu T Lalhlimpuia leh LDBBA hruaitute nen a hmun kan tlawh a, hman ṭangkai dan dapa sawiho a nih hnuah basketball hmunhma atan cheibawl ni se kan ti ta a ni," a ti a; duat taka enkawl a, infiamnain hma a sawn theih nan ṭangkai taka hmang turin LDBBA hruaitute a chah.

Inkhawmah hian Lunglei West bialtu MLA T Lalhlimpuia, LDBBA president Moses Lalrinchhana Chinzah leh SYS joint director C Lalremsanga te pawhin thu an sawi.

Sazaikawn Multipurpose Indoor Stadium hi Urban Sports Infrastructure Scheme sum cheng vbc 6 senga sak a ni a; Lushai Engineers sak niin, February 9, 2018 khan hawn a ni. Hman ṭangkai zui loha hun rei tak a awm hnuah basketball khelh theihna turin SYS department cheng nuai 25 sengin an chei ṭha a ni.

SYS department leh LDBBA inremna ang chuan hall neitu nihna chu SYS department kutah awmin, a enkawltu (guardian) chu LDBBA a ni dawn a; hall aṭanga pawisa lak luh hi SYS department-ah 30%, hall enkawl nan management committee-ah 50% leh LDBBA hnenah 20% a lut ang. Inremna hian November 15, 2025 aṭanga kum thum chhung a huam dawn a, inremna hi a ṭul anga ennawn theih tura ruahman a ni bawk.