Minister-in phullem phahna tur tlawh

Sports & Youth Services minister Lalnghinglova Hmar chuan November 15, Inrinni zing khan Thenzawl Loṭhazawl khelmuala phûllem phahna tur a tlawh.

Loṭhazawl a tlawhnaah Lalnghinglova Hmar chuan, Thenzawl chu Mizoram khaw laili leh pan nuam, mipui tam tak punkhawm theihna tur a nih thu a sawi a, "Loṭhazawl khelmuala artificial turf phah tur pawh inkhel pawimawh tak tak thleng thei ngei turin uluk tak leh a len zawngah pawh international match khelh theihna tling ngeia phah a ni dawn," a ti.

Sorkarin Thenzawl bakah Serchhip district hmasawn nan theihtawp a chhuah tih sawiin Minister chuan, NESIDS-OTRI aṭanga Serchhip Multipurpose Indoor Hall sakna tur DPR thehluh tawh chu a puitlin thuai beisei a nih thu a sawi.

Loṭhazawl khelmuala phûllem phahna atan hian PMJVK hnuaiah cheng vbc 11.85 ruahman a ni a, sum hmuh a ni tawh. Tihfel ngaite tihfel thawkhat tawh a ni a, tender chhuah thuai tura hmalak mek a ni.