LADC inthlan chuh turin mi 82-in hming an pe lut

December 3, 2025-a Lai Autonomous District Council (LADC) MDC inthlan awm tura chuh tuma hming pek luh 82 chu endik a nih hnuah pawm vek a ni. LADC-ah hian member of district council (MDC) bial 25 a awm.

LADC inthlan chuh tur hian November 14, 2025 Zirtawpni tlai dar 3 thleng hming pek luh theih a ni a, mi 82-in hming an pe lut. Hming pek luhte chu November 14-ah vek tlai dar 3 aṭanga endik nghal a ni a, hnâwl awm loin, pawm vek an ni. Inhnûkdâwk duh tan vawiin chhun dar 12 thleng hun hawn a ni ang.

Inthlan chuh tura hming pe luttute chu - ZPM candidate mi 25, MNF candidate mi 20, INC candidate mi 14, BJP candidate 10 leh independent candidate mi 13 an ni.

LADC inthlanah hian December 3, 2025 zing dar 7 aṭanga tlai dar 4 thleng vote thlak a ni dawn a, vote tlate chu Devember 9, 2025 zing dar 8-ah chhiar ṭan a ni ang.