Zobawkah kawng dang; titawp leh nghal

Zobawk khaw chhunga NH kawngpui a chhiat lutuk avang leh kawng enkawltu NHIDCL lamin hun rei tak kawng siam an chawlhsan tawh avanga lungawi lohna lantir nan Zobawk Joint YMA chuan nimin khan NH-54 kawngpui an dang. Niminah vek kawng siam chhunzawm a nih avangin kawng dan an titawp leh nghal.

Zobawk Joint YMA hian an khaw chhunga NH kawng zauhnaah kawng la laih zawh lohte November 15, 2025 ral hmaa chhunzawm tura National Highways and Infrastructure Development Corporation Limited (NHIDCL) an ngennain awmzia a neih loh avangin nimin zing dar 6 aṭang khan tiam chin awm loin NH-54 kawngpui an dang a ni.

Kawngpui hi hmun hnih - Tlawng lui kamah leh hmar lama khaw tawntirhah an dang a; kawng dannaah hian YMA member eng emaw zat bakah, YMA thawhpui tlawmngai pawl dangte an thawk chhuak a ni.

Zobawk Joint YMA chuan, an phût angin kawng siamtu company-in nimin vêk khan kawng siam hna an chhun-zawm leh tâk avangin kawngpui an dan chu an titawp tih an puang bawk.