MZU-ah disaster management training

Mizoram University Centre for Disaster Management chuan nimin khan MZU conference hall-ah 'Capacity Building Training on Inspiring the Minds for Disaster Risk Reduction (IMDRR2025)' an buatsaih ṭan a; a hawnna inkhawm Aizawl District Disaster Management Authority (ADDMA) chairman Lalhriatpuia'n a hmanpui.

ADDMA Chairman chuan, rîkrum kaihhnawiha biak pawh theihna, 24x7 Emergency Control Room no. 1077 hman theih a nih thu a sawi a, "Aizawl district chhunga chhiatna thuah operational zone 17 leh zonal officer 16 siam a ni. May ni 30, 2025 khan hnâwl vûng paih dan tura hmalak dan tur, Debris Clearance SOP siam a ni a, SOP siam hma hian Rs 2,21,68,054 sên a nih laiin, SOP siam hnuah chuan Rs 40,97,300 chauh sen a ni tawh," a ti.

Debris Clearance SOP angin, chhiatna thlen hma, thlen lai leh thenfai a nih hnua thlalak a ngai tih sawiin Lalhriatpuia chuan, "Zonal officer-te'n an huam chhungah an enfiah hnuah, hnâwl vûng paih zat milin pawisa pek chhuah a ni," a ti a; India rama Debris Clearance SOP siam hmasak ber a nih avangin hmun danga hman a nih ve theih nan NDMA pawhin an rawn ngaihven thu a sawi.

Ni thum awh tur training-ah hian district hrang hranga disaster management khawih SDC officer-te leh incharge te, college hrang hranga zirtirtitute leh MZU-a professor, scholar leh zirlaite an tel a ni.