National Press Day hman a ni

Nimin khan Aizawl leh district dang ṭhen-khatah National Press Day (Chanchinbumite Ni) hman a ni. Aizawlah chuan MJA General Headquarters leh IPR Directorate huai-hawtin IPR Auditorium-ah hman a ni a, IPR secretary Betsy Zothanpari Sailo-in a hmanpui.

Aizawla Chanchin-bumite Ni hmanna inkhawm hi IPR director K Vanlalsangi'n a kaihruai a; khuallian Betsy Zothanpari Sailo chuan, chanchinbumite chu ram tana rawngbawltu pawimawh tak an ni tih sawiin, sorkar thâ tichak zel tur leh mipui zirtir tura an dinhmun pawimawhzia hria a, ṭhahnemngai taka theihtawp chhuah zel turin a fuih.

IPR Secretary chuan, khawvel hmasawn zel karah chanchinbu chu mi tam takin hriatna hnâr rintlak bera an ngaih a nih reng thu a sawi a; chanchin thar lak khawm leh puanzarah fimkhur leh thuhnu dáwn tak chunga kal turin chanchinbumite a chah a ni.

National Press Day hmannaah hian MJA president C Lalram-buatsaiha'n inlawmna thu a sawi a, IPR deputy director Pratap Chhetri-a'n ‘The Role of Print Media in the Digital Age' tih thupui a zirpui.

November 3, 2025-a Bharat Ratna Dr Bhupen Hazarika National Award 2025 dawngtu LR Sailo, IPR director hlui leh MJA member zinga Mass Communication-a doctor of philosophy sual chhuaktu Dr Lalnunkimi Colney te hnenah lawmpuina hlan a ni.

Chanchinbumite Ni hi Lunglei Press Club-ah pawh hman a ni a, Lunglei MJA vice president Lianchama Chhangte-in kaihruaiin, Lunglei SP J Lalmuankima'n a hmanpui.

J Lalmuankima chuan, chanchin-bumite chu 4th Pillar of Democracy tih an nih thu sawiin, an pawimawhna hre chiang a, intuaihriam deuh tur te, tunlai thiamna hmang ṭangkai thiam tur leh investigating journalism lam thûk zawka luhchilh turin a fuih.

Lunglei MJA president H Lalthansanga pawhin thu a sawi a; press mite mawhphurhna, Mizo ṭawng dik leh aia upa zah chungchang bakah, RTI Online chungchang zirho a ni.