Larsapin India ram fang turte a vailiam

Assam Rifles chuan hnam inpumkhatna leh inunauna tihhmasawnna atan Mizorama zirlai 20 leh zirtirtu pahnihte tan National Integration Tour (NIT) an buatsaih a, nimin khan Governor Gen. Dr Vijay Kumar Singh-a'n Raj Bhavan aṭangin a vailiam.

NIT-a kalte hi Lunglei, Siaha leh Lawngtlai district-a zirlai thlan chhuah 20 leh zirtirtu pahnih an ni a, anni bakah hian anmahni hruaitu AR official-te an tel. Guwahati, Amritsar leh Delhi-a hmun pawimawhte leh sipai hmunte an tlawh dawn a; November 29, 2025 rawn let leh tura beisei a ni.

Gen. VK Singh chuan, NIT-a kal turte a lawmpui thu sawiin, "Tour kaltlanga in thil zir turte hian zirna mai bakah, in ṭhanlen zelna kawngah hriatna leh thiamna pein a pui dawn che u a ni," a ti a; Sairang rêl chawlhhmun aṭanga tour an ṭan tur chu a lawm thu sawiin, rêlin Mizoram chhim lam district-te a la thlen dawn thu a sawi.

India rama hnam ziarâng leh nunphung hrang hrang awmte chu India chakna leh inpumkhatna atana pawimawh a nih thu sawiin Larsap chuan, zirlaite chu an kalna apiangah hriat belh duh an neihte inthlahrung loa hotute zâwt zel turin a chah.

National Integration Tour-a kal turte vailiamnaah hian Assam Rifles 23 Sector DIG Brig. Puspendar Sorayan leh officer dangte pawh an tel a; tour-a kal turte chu Governor-in lukhum a khumtir ṭheuh a ni.