KHAWTHLIR
ṬKP-in thisen pe
ṬKP, Shalom Unit, Mission Vengthlang chuan November 15, Inrinni khan thisen pek an huaihawt a, Civil Hospital, Aizawl tan thisen unit 27 an pe a, petute mipa 24 leh hmeichhia pathum an ni.
MZU-ah zirhona
Mizoram University-a Department of Education chuan nimin khan MZU Guest House-ah 'Empowering Educators: Integrating Life Skills Across the Curriculum and Co-curricular Domains’ tih thupui zirhona an buatsaih ṭan a, ni 12 chhung neih a ni ang. Zirhona hawnnaah hian Indian Association of Life Skills Education dintu Prof. MN Musthafa chu khuallian niin, MZU vice chancellor Prof. Dibakar Chandra Deka chu khualzahawm a ni a; MZU Education HoD Prof. Lalbiakdiki Hnamte-in NEP 2020 mila ni tin nuna hman theih zirlai buatsaih dan a sawi.
Mamitah tui sawiho
Mamit District Committee on District Water Sanitation Mission chu nimin khan an chairman Laltlawmlova hoin a pisaah an ṭhukhawm. Tui humhalh chungchang te, tui sem dan leh tui chungchanga dan awmte sawiho a ni a; tui lâk (drinking water supply) kaihhnawiha thil sual tite hremna dante a theih anga zaua puanzar relin, Village WATSAN Committee-te lo puangzar ve tura hriattir ni se an ti.
Saza humhalh dan tur inzirtir
Tun hnaiah Ngaizel khâmah saza chhungkua hmuh a ni a, hei vang hian ASEP chuan nimin khan Ngaizel pheia awm Solomon’s High School zirlaite zingah Environmental Awareness Campaign an buatsaih. ASEP hruaitute Solomon's H/S zirlaite chu saza humhalh dan tur leh an hmuh châng pawha awm dan turte an zirtir a; thla an la duh a nih pawhin an nun tirálkhèl thei zawngin awm lo turin an chah a ni.
Luh chhuah khap
Siaha additional district magistrate Abraham Beirazi Khithie chuan hriattirna tichhuakin, tuihri nia hriat lêng avangin Siaha district-a Lopu leh Khaikhy ram chhungah India ramri kâna luh leh chhuah phal a nih loh thu a puang.
Lawngtlaiah No Vehicle Day
Lawngtlai bawrhsap Donny Lalruatsanga kaihhruaiin nimin khan a pisaah sorkar hotute leh khawtlang hruaitute'n kumin Krismas leh kum thar lawm vuakvetah mipuite'n ralmuang leh him zawka hun an hman theih dan tur an rel. Lawngtlai Bawrhsap hoa ṭhukhawm chuan mipuite'n zalen taka mamawh leia bazar-na hun an neih theih nan December 19, 2025-ah Lawngtlaiah 'No Vehicle Day' puan ni se, an ti.
Lungleia MZSU dah theih nan hmalak rêl
Lunglei High Powered Committee (HPC) chu nimin khan vice chairman V Malsawmtluanga, Lunglei North bialtu MLA hoin an ṭhukhawm a; Mizoram State University chu Lungleiah dah a nih theih nan hmalak an rêl. HPC chuan Mizoram State University chungchang hi HPC chairman Lalduhoma, chief minister hoa ṭhutkhawm hunah sawipui ni se an ti. Ṭhutkhawmah hian MLA pahnih - Lalramliana Papuia leh T Lalhlimpuia te, ZPM Southern Hqrs president C Lalhmingliana leh member dangte an tel a ni.