LADC inthlan awm turah mi 2 an inhnûkdâwk

December 3, 2025-a Lai Autonomous District Council (LADC) MDC inthlanpui awm tura hming pe lut zinga mi pahnih nimin khan an inhnûkdâwk a, candidate mi 80 an awm dawn.

LADC inthlan chuh turin mi 82-in hming an pe lut a, inhnuhdawh theih hun nimin chhun dar 12 khan a tàwp. Inhnuhdawh theih hun chhungin independent-a chuh tura hming pe lut pahnih - Sangau West biala chuh tum C Lallungmuana leh Paithar biala chuh tum J Thangkhuma te an inhnûkdâwk a ni.

LADC inthlan turah hian MDC bial 25-ah candidate 80 an awm dawn ta a; BJP-in candidate 10, INC-in candidate 14, MNF-in candidate 20 leh ZPM-in candidate 25 an nei a, independent-a ding tur mi 11 an awm bawk.

Tarlan tawh ṭhin angin LADC inthlan turah hian December 3 zing dar 7 aṭanga tlai dar 4 chhung vote thlak a ni dawn a, vote tlate chu December 9 zing dar 8 aṭanga chhiar ṭan tur a ni.