Vande Mataram kum 150 tlin pualin Media Conclave - Vartalap buatsaih

Press Information Bureau (PIB) chuan India national song ‘Vande Mataram’ kum 150 tlin lawmna pualin nimin khan IPR Auditorium-ah Media Conclave - Vartalap an buatsaih a, Information, Public Relations, Printing & Stationery minister B Lalchhanzova'n a hmanpui.

B Lalchhanzova chuan, Conclave-a zir tur thupui zinga mi, ‘GST Reforms 2025: Relief for Common Man, Boost for Business’ tih chu pawimawh a tih thu sawiin, "Ram tihhmasawn nan leh ram leilung fate thinlungah neitu nihna thinlung, ram hmangaihna rilru kan put tlan theih nan chhiah hi hmanraw ṭangkai tak a ni," a ti.

IPRPS Minister chuan, "Sorkar laipui rinchhan ngai lutuk loa inrêlbâwlna kan neih theih nan chhiah pek ngaite kan ngaih pawi­mawh a ṭul," a ti a; chhiah hmang­a ram siam­ṭhat hna kalpui a nih theih nan a enkawl Land Revenue & Settlement department-ah pawh chhiah lak dan kalphung thlak danglam a nih thu a sawi.

Tribal chenna khua tihhmasawnna tura sorkar laipuiin ruahman Adi Karmayogi Abhiyan siam a ni chu ṭha a tih thu sawiin B Lalchhanzova chuan, "Thingtlang khaw hrang hrang tihhmasawn nan sorkar department-te thawhho thiam a pawi­mawh. Mahni inrêlbâwl thei tur khawp thiamna, theihna leh hriatnate khaw hrang hrangah pek a ṭul a, thingtlang mite hi ram hmasawnna atana thawktu pawimawh berte zinga mi leh hmasawnna tehfung pawimawh tak an ni," a ti.

Media Conclave - Vartalap-ah hian chanchinbumi te, Mizoram University leh ICFAI University zirlaite an tel a; khualzahawm HK Lalhawngliana, State Tax commissioner leh Doordarshan Kendra, Aizawl director (News) Nampibou Marinmai te pawhin thu an sawi.

HK Lalhawngliana chuan, dik tak leh a hun taka chhiah lak khawm a nih theih nan Quick Response Team din a nih thu a sawi a; September 22, 2025 aṭangin GST 2.0 kalpui ni mah se, Mizorama chhiah hmuh a ṭhan zel thu a sawi bawk.

Conclave-ah hian technical session-ah MZU Political Science-a mi Prof. Ayangbam Shyamkishor chuan ‘Commemoration of 150 years of Vande Mataram’ tih thupui a sawi a; MZU Economics professor Prof. James LT Thanga'n ‘GST Reforms 2025: Relief for Common Man, Boost for Business’ tih thupui sawiin, Planning deputy secretary Biakthansangi Hrahsel-in ‘Adi Karmayogi Abhiyan: Empowering Individuals & Institutions for Tribal Transformation’ tih a sawi a ni.