Larsap hoin Cooperative Conclave hmang

NABARD, Mizoram Regional Office chuan International Year of Cooperatives 2025 pualin nimin khan Hotel Regency-ah Cooperative Conclave an buatsaih a, Governor Gen. Dr Vijay Kumar Singh-a'n a hmanpui. Thupui chu 'Cooperatives build a better world' tih a ni.

Gen. VK Singh chuan, tun hma aṭang tawhin Mizo khawtlang nun chu thawhhona ṭha nei a nih avangin Mizoramah cooperative hlawhtlin lohna chhan tur a awm loh thu a sawi a, "Hmanrua, inkaihhruaina leh hmalakna en zuina ṭha bakah, taima lehzuala ṭan lakna hmangin cooperation harhtharna hlawhtling tak kan kalpui thei a ni," a ti.

February 2023 aṭangin Mizoramah MPACS hlawhtling taka kalpui a nih thu sawiin Larsap chuan, "March 31, 2026 ral hma ngeiin MPACS 216 din hman a nih ngei ka beisei. MPACS (Multipurpose Primary Agricultural Credit Societies) tum a hlawhtlin theih nan hmeichhia leh ṭhalai tam zawk an tel a ṭul thu a, ram leilung tichhe lo zawnga hmalak a ṭul," a ti a; loneitu leh rethei zawkte cooperative hmanga chawikân tuma theihtawp chhuah turin kal khawmte a chah.

Governor chuan, India chu khawvela cooperative inzar pharhna ram lian ber a nih thu sawiin, cooperative society 8,40,000 vel leh member vaibelchhe 29 vel an awm thu a sawi a, "MPACS, FPO (farmer producer organisation) leh self help group te ṭha taka kan kaihhruai a, thil deh chhuah hralhna ṭha tak kan ruahmansak phawt chuan kawng hrang hrangah hmahruaitu kan ni thei a ni," a ti.

Larsap hian NABARD-in MPACS awareness video an siam chu a tlangzarh a; MPACS hna thawk ṭha - Khanpui MPACS, Luangmual MPACS, Champhai LAMPS leh Champhai Town MPACS te hnenah chawimawina a hlan.

Cooperation department secretary Udit Prakash Rai chuan, cooperative sector tan State Cooperative Policy siam peih thuai a nih dawn thu a sawi a; Ministry of Cooperation kalphung thar hnuaiah digitisation-in nasa taka hma a sawn thu sawiin, "Tun dinhmunah PACS 24 chu online-a kalpui a ni tawh," a ti a; kum 2027-ah chuan PACS zawng zawng computerise vek tum a nih thu a sawi.

Cooperative Conclave-ah hian Cooperative Society registrar John LT Sanga, Agriculture secretary Ramdinliani, Horticulture secretary Maria CT Zuali, NABARD general manager Pankaja Borah, Aizawla Reserved Bank of India general manager T Lhungdim leh cooperative hruaitute an tel a ni.