KHAWTHLIR

Meet the Public

Aizawl North-III bialtu MLA K Sapdanga, minister chuan a bial mipuite'n awlsam zawka an dawr theih nan nimin khan a bialah 'Meet the Public' a buatsaih leh a; chawhma lamah Zarkawt Local Council House-ah ṭhuin, chawhnu lamah Electric Veng MUP Rûnah a ṭhu. A bial mipui eng emaw zatin an mamawhte an thlen a ni.

Press Day hmang

Hnahthiala Information Public Relations department leh MJA te chuan November 17, Thawhṭanni khan IPR pisaah National Press Day (November 16) an hmang. Hnahthial IPRO F Lalrinfela'n National Press Day chungchang a sawifiah a, inkawmhona hun hman nghal a ni.

Minister-in hmanpui

Minister PC Vanlalruata chuan nimin khan a bial chhunga Darlawng Middle School silver jubilee lawmna a hmanpui. PC Vanlalruata chuan, sorkar hna ringawta innghat lo tur leh lehkhathiam chuan hna dang pawh thawk se an tan thil tih a awlsam ṭhin tih hre reng turin zirlaite a chah a, "Zirna hian kan dinhmun leh kan nih phâk loh thleng min nihtir thei a ni," a ti.

PECA zirho

National Health Mission leh Lunglei district National Tobacco Control Programme ṭang dun chuan nimin khan Lunglei SP conference hall-ah electronic cigarette khapna dan, Prohibition of Electronic Cigarettes Act, 2019 (PECA) zirhona an buatsaih. Zirhona hi Lunglei SP J Lalmuankima'n a kaihruai a, Lunglei SP office-a thawkte bakah, Lunglei, Bunghmun, Lungsen leh Tlabung police station-a dan leh thupek kengkawhtute an tel a ni.

Kawng khar dawn

Traffic SP C Vanlalvena chuan thupek chhuahin, PHE department-in Zemabawk Kawnveng aṭanga Cancer Hospital inkar kawngah pipe an phûm dawn avangin vawiin aṭanga December 12, 2025 thleng zing dar 9 leh zan dar 7 inkarah a ṭul dan azirin kawng khâr a nih ṭhin dawn thu a tarlang. Chaltlang Dawrkawn aṭanga Bawngkawn inkara pipe phûm avangin hna thawh zawh hma chu zan dar 9 aṭanga zing dar 6 thleng a ṭul anga kawng khâr ṭhin a nih dawn thu a tarlang bawk.