Mobile Medical Unit van thar vailiam

Health & Family Welfare minister Lalrinpuii chuan nimin khan MINECO aṭangin Mamit district-a hman tur Mobile Medical Unit (MMU) van thar a vailiam.

MMU van hi TATA Yodha pick-up a ni a, cheng nuai 12 man a ni. X-ray leh test chi hrang hrang enna khawl leh bungrua nen cheng nuai 26 chuang hmanga thuam a ni a, TATA AIG General Insurance Company Ltd leh Swasti - The Health Catalyst ten CSR sum aṭanga an lei a ni.

MMN van hmangin NHM leh MFM ten mobile health clinic an nei ṭhin dawn a, Mamit district-a khaw hrang hrangah doctor, nurse leh damdawi lama thawktu dangte nen a kal kual ṭhin ang.

Minister Lalrinpuii chuan Mamit district chu aspirational district a nih thu sawiin, district mipui an hrisel zawk theihna tura MMU van thar an nei chuan rah ṭha a chhuah ngei a beisei thu a sawi a, "MMU van hmang hian thingtlang kilkhâwr leh damdawi-in pan harsatna hmunahte awlsam zawkin mipuite an inentir thei dawn a ni," a ti.

MMU van project-ah hian regular health camp buatsaih ṭhin a nih dawn thu sawiin Lalrinpuii chuan, "Natna awm thei ven kawngah te, counselling leh damdawi-in lian zawka a hun taka in refer nante a ṭangkai hle dawn a ni," a ti a; mipuite'n hriselna lama sorkar scheme awmte an hriat a, mi tam zawkin an chhawr ṭangkai theih chu project-in a tum a nih thu a sawi bawk.

MMU van vailiamna puala Health Minister pisaa inkhawm tawi buatsaihah Health secretary H Lalengmawia pawhin thu a sawi a; MFM executive director Lalramchuanzela'n Mamit district khaw hrang hranga MMU van hman dan tur a sawifiah.

Vailiam inkhawmah hian NHM mission director Dr Lily Chhakchhuak, TATA AIG vice president Devang Pandya leh Swasti senior director Joseph Julian te pawh an tel a ni.