Rajasthan Minister-in Mizoram a rawn tlawh

Rajasthan state sorkara Panchayati Raj leh Education changtu minister Madan Dilawar chuan Mizoram a rawn tlawh a, nimin khan Rural Development & Administration minister Prof. Lalnilawma leh department hotute nen an inkâwm.

Mizoram Exposure Visit-a rawn zinte hi Madan Dilawar bakah, department official-te leh panchayati raj member mi 21 an ni a; sorkar laipuia Ministry of Panchayati Raj scheme Rastriya Gram Swaraj Abhiyan (RGSA) hnuaia hnathawhte an rawn zir a ni.

Mizoram RDA minister pisaa inkawmnaah Prof. Lalnilawma chuan, ram leh ram intlawh tawna inzir tawnnain rah ṭha tak a chhuah ṭhin thu sawiin, thingtlang hmasawnna atana hmalakna hrang hrangah hna thawh dan leh chin dan ṭha zawkte chhar chhuah a, inpuih tawn zel theih a nih thu a sawi.

Madan Dilawar chuan, Mizoramin an lo dawnsawn danah an lawm thu a sawi a, Rajasthan tlawh ve turin Prof. Lalnilawma leh official-te a sáwm. Minister zuitute pawhin Mizoram chu nuam an tih thu te, ramngaw, thing leh mau te hmuhnawm an tih thu leh Mizo mipui hawihhawmna chu mawi an tih thute an sawi bawk.

Inkawmnaah hian RDA sec-retary R Zarzosanga leh depart-ment hotu dangte an tel a; Rastriya Gram Swaraj Abhiyan state programme manager John Lalnunsanga'n RGSA hnuaia Mizoramin hma a lak dante a sawifiah.

Madan Dilawar leh a hote hian nimin vek khan Reiek leh Ailawng rama RGSA hnuaia hnathawhte an tlawh a; tlai lamah lamah Education minister Dr Vanlalthlana leh RDA minister Prof. Lalnilawma te nen an inkawm leh bawk. Vawiin hian Falkawna Zokhua leh ZMCH an tlawh leh dawn a ni.