An DA tihpun a nih avangin sorkar hnathawkte an lawm

Federation of Mizoram Government Employees and Workers (FMGEW) chuan thuchhuah siamin, November 17, Thawhṭannia Council of Ministers ṭhukhawmin sorkar hnathawkte dearness allowance (DA) tihpun a rêl avangin an lawm thu an tarlang.

FMGEW chuan, an dilna ngai pawimawhin Cabinet-in Mizoram sorkar hnathawkte'n DA 40% an lak mek chu November 1, 2025 aṭangin 4% a tihpun a remtih bakah, April 1, 2026 aṭangin 2%-a tihpun leh a rel tih tarlangin, "Kan lawm tak zet a ni. Sum harsa tak karah sorkarin pawisa fai (cash)-a DA pung min pe tur hian kan lawm a tizual hle," an ti.

Tunah hian sorkar laipui hnathawkte'n DA 58% an la mek tih tarlangin FMGEW chuan, "Anni hi chuan thla ruk danah Consumer Price Index (CPI) milin an tipung ṭhin," an ti a; tuna Mizoram sorkarin DA a pek thar tur 44% chu kum hnih vel kal taa sorkar laipui hnathawkte DA lak zat a nih thu an tarlang.

FMGEW chuan, allowance pek dan tur Mizoram sorkar notification ding lai anga sorkar laipui hnathawkte ruala ke an pên ve zel theih nan sorkarin a ngaihtuahsak zel an beisei thu an tarlang bawk.