School Education-a hna dilnaah document rinhlelhawm a tam

School Education minister Dr Vanlalthlana kaihhruaiin nimin khan Planning conference hall-ah School Education department Quarterly Review Meeting neih a ni a; hna dilna atan School Education department hnena document rinhlelhawm thlentu an tam avangin chak lehzuala hmalak a ṭul thu an sawi.

Ṭhutkhawmah hian sorkar hna dil leh thawk tawh zingah academic document lem hmang ṭhenkhat hmuh chhuah an nih ṭhin thu sawi a ni a, chutiang mite chu hrem niin, bân an nih dante tarlan a ni.

Sikul tlawh chhuaha endik dan tur te, zirna hmanga zirlai naupangte ruihhlo leh zûk leh hmuam laka fihlim tura inkaihhruai dan tur te, zirtirtu hna dil tana syllabus hman tur bik duan te, district inrelbawlnaa Sub-Divisional Education Officer-te Samagra Shiksha Office-a mawhphurhna pek te, HSLC leh HSSLC result siam dan phung ṭha zawk tur te, Samagra 3.0 chungchang leh academic document lem zawn chhuah chhunzawm dan turte an sawiho bawk.