CM Zoramthanga'n PM Modi a kâwm

Chief minister Zoramthanga chuan nimin khan prime minister Narendra Modi chu New Delhi-a a pisaah a kâwm a, Mizoram mamawh hrang hrang a sawipui.

CM Zoramthanga chuan, Mizoramin all India service cadre hran a neih a ṭul thu sawiin, "Hei hian nasa takin state sorkar hnathawh a tichakin a tiawlsam dawn a ni," a ti a; Mizoram Assembly-in kumin March thlaa a pass tawh The Mizoram Maintenance of Household Register Bill, 2019 chu tun thlengin Governor-in a la pawmpui lo tih sawiin, tihfel thuai a nih theih nan hmalakpui turin PM a ngen a, "Hei hian dan leh thupek kenkawhna leh ram venhimnaah nasa takin sorkar a puih beisei a ni," a ti.

Ministry of DoNER leh North Eastern Council (NEC) aṭanga hmarchhak state-te sum hmuh chu a beitham hle tih sawiin Zoramthanga chuan, tihpun a ṭul thu Prime Minister a hrilh a; Zoram Medical College chu AlIMS zûlzuia medical college leh hospital-a siam a ṭul thu a sawi.

Chief Minister hian nimin vek khan Union Finance minister Nirmala Sitharaman chu a pisaah a kâwm a, JICA leh ram páwn lam agency aṭanga Mizoram tana sum tam zawk hmuh theih dan tur a sawipui. CM hian Mizorama kawngpui ṭhenkhat chu JICA sum hmanga siam a rawt a, India hmarchhak bial tana DoNER leh NEC-a sum tam zawk dah chungchang a sawipui bawk.

CM Zoramthanga chuan Civil Aviation leh Urban Development enkawltu minister Hardeep Singh Puri pawh a pisaah a kâwm bawk a; Aizawl leh Delhi inkarah thlawhna direct service a awm theih dan tur leh, Aizawl leh Mizoram khawpui dangte tihhmasawn dan tura rawtna hrang hrangte a sawipui a ni.