Synod-in Mizo ṭawng hman uar an rêl

Synod Inkhawmpui vawi 96-na, Mission Veng Kohhran biak-ina neih mekah nimin khan rorel chhunzawm a ni a; Mizo ṭawng humhalh leh hman uar chungchanga hmalak an rél.

Kumin Synod Inkhawm-puia general agenda 46 zinga nimin thlenga an pawm tawh zingah, 'Mizo ṭawng humhalh, vawnhim leh hmang uar tura nasa zawka hmalak rawtna' chu an pawm a; ṭawng chungchanga agenda dang, 'Mizo ṭawng a tam thei anga hmang tura rawtna' an pawm bawk. Hengte hi Synod Executive Committee (SEC) bawhzui turin an dah a ni.

Inkhawmpui hian Kristian Hla Bu ennawn rawtna an pawm a, SEC bawhzui turin an dah a; Kohhran Pavalai Pawl din ṭan ní zir chian rawtna an pawm. Synod Inkhawmpui rorel zingah, kohhran lian leh tê zawkte nena thawhhona siam rawtna te, Senate of Serampore College (University) hnuaia theology zir chhuakte'n zau zawka rawng an bawl theih dan tur kawng zawn rawtna te, Pathian thu zir chhuakte tana special ordination siam dan kawng zawn chungchangte a tel bawk.

Synod rorel hi moderator Rev. R Lalchangliana'n a kaihruai a, vawiin leh naktukah chhunzawm leh a ni ang.