Lungleia Lena Sports Stadium hawng

Lungleia Lena Sports Stadium sak thar chu December 4, Nilaini khan UDPA department changtu, deputy chief minister Tawnluia’n a hawng. Stadium siam nan hian cheng nuai 2,418 sên a ni.

Deputy Chief Minister chuan, stadium chu neitu rilru púa duat taka enkawl turin mipui chahin, "Infiammite hmakhua ngaiin sorkarin nasa takin hmalak zel a tum a, sport lama inkaihhruaina mumal tak Mizoram Sports Policy neih a ni tawh a, sport kaihhnawih hmasawnna ruhrelte pawh a ṭul anga ruahman zel a ni ang," a ti. 

Tawnluia chuan, UDPA department kaltlangin khaw­pui hmasawnna tur mamawh hrang hrang - community hall, sport stadium, multi storey building, bawlhhlawh sawngbawlna (solid waste management)-te ruahman zel a nih tur thu sawiin, Parking House Support Scheme (PAHOSS) chu Lungleiah pawh kalpui thuai tum a nih thu a sawi.

Lunglei khawpui leh a chhehvelin tui hnianghnar zawka an dawn theih nan PWD-in Mat lui tui pump tura hma an lak mek thu leh DoNER-ah cheng vbc. 400 hû DPR thehluh a nih tawh thu a sawi. Hawnna inkhawmah hian khualzahawm, minister C Lalrinsanga, Sports minister Robert Romawia Royte, Lunglei HPC vice chairman Lawmawma Tochhawng leh Lena fapa P Lalbiaka leh Serkawn VC President te pawhin thu an sawi a; MLA dang pathum - Dr Vanlalṭanpuia, Dr K Pachhunga leh C Lalmuanpuia te an tel bawk.

Lena Sports Stadium hi Ministry of Urban Development (2017 kum aṭanga Ministry of Housing and Urban Affairs tiha koh)-in cheng nuai 2,418 a pek hmanga sak a ni a, May 16, 2014-ah siam ṭan niin, October 30, 2019-ah zawh a ni.

Stadium-ah hian football khelmual metre 90X60-a zau phullem phah leh intlansiakna tur (8 lane synthetic running track) a awm a; mi 1,000 ṭhut theihna gallery leh mi 500 lenna VIP gallery bakah thil dang chi hrang hrang a awm bawk.