KHAWTHLIR

Lengpui Branch KṬP chuan nimin khan Lengpui community hall-ah blood donation camp an huaihawt a, Synod Hospital Blood Bank tan thisen unit 33 an pe a, petute mipa 29 leh hmeichhia pali an ni.

Mizoram Economic Association chuan nimin khan Economics & Statistics conference hall-ah Annual Conference an hmang. Conference-ah hian chawhmaah ro an rél a, chawhnu lamah academic session an nei. Mizoram University hnuaia B.A (Economics)-a ti ṭha ber Lalnunsiama leh M.A (Economics)-a ti ṭha ber B Lalnuntluanga te hnenah lawmpuina thilpek an hlan a ni.

South Vanlaiphai Baptist Kohhran chuan ni thum chhung an kohhran kum 100 tlin an lawm. BCM, South Vanlaiphai Kohhran hi Mizoram chhim lama kohhran ding hmasa zinga mi, kum 1919-a din a ni a; tun dinhmunah chhungkua 109 leh kohhran member 693 an awm mek a ni.

Salvation Army, Territorial Headquarters hnuaia Tailoring Centre chuan nimin khan puanṭhui zir zote thlahna hun CHAN conference centre-ah an hmang. Puan ṭhui zir chhuak mi pariat hnenah puanṭhui khawl leh certifcate hlan a ni.

Aizawl SP chuan thupek chhuahin, Kawnpui - Sihphir - Durtlang - Aizawl inkar kawng BRTF-te'n siamṭhat hna an thawh mekah bahlah lo leh tluang taka hna thawh a nih theih nan lirthei tlàn dan tihdanglamna thupek chhuah tawh chu chhunzawm a nih tur thu a tarlang. Aizawl-Kawnpui tláng kawngah hian December 4 aṭanga December 31 thleng maxicab aia lian lirtheite zing dar 8 aṭanga tlai dar 5 inkarah tlân phal a ni lo.

Khawzawl Road Protection Squad chuan a vawi khat nan nimin zing khan Khawzawl SDO (Sadar) ST Lalvensangi hoin Khawzawla kawngpui dinhmun an enfiah. Kawngpui tichêptu, kawng sira in sakna bungrua dah te, kawng bul hnaih lutuka tuizêm leh thil dang dahte chu senghawi turin a neitute an hriattir a; kawngpui huam chhunga lungremte pawh ṭhiata siam ṭha turin in neitute an hriattir bawk.