Sorkarin HIV dona atan budget-ah Sum dah a tum - Health Minister

Ministry of Health and Family Welfare hnuaia National AIDS Control Programme (NACP) leh Mizoram sorkar chuan nimin aṭang khan Taxation department auditorium-ah 'Integrated HIV/AIDS Action Plan' review meeting an buatsaih. A hawnna inkhawma khuallian Health minister Dr R Lalthangliana chuan, Mizoram sorkarin HIV/AIDS dona atan budget-ah sum dah tum a nih thu a sawi. 

Dr R Lalthangliana chuan, Mizorama HIV/AIDS darh nasa lutuk do turin hma latu mithiamte chu ngun leh zuala Mizote mizia, nunphung leh rilru puthmang zir chiang turin a chah a, "Mizoramah National AIDS Control Programme awmze nei zawka kalpui a nih theih nan state dangte nen kan inan lohna tam tak hre chunga hmalak a ṭul," a ti. 

Health Minister chuan, HIV/AIDS chungchang inzirtirna programme uar lehzuala kalpui zel ṭul tih sawiin, "Mizorama kohhran pawl hrang hrang leh tlawmngai pawl hruaitute ka kâwm tawh. Sorkarin HIV do nan budget-ah a hranpaa sum dah a tum thu leh he natna hlauhawm tak a darh zel loh nan nasa leh zuala hmalak tum a ni," a ti a; Mizoram aṭanga HIV/AIDS ûmbo a nih theih nan kalphung thar duan chhuah a beisei thu a sawi.

Ministry of Health and Family Welfare-a special secretary Sanjeeva Kumar chuan, "Mizoram sorkarin HIV/AIDS dona tur budget-ah sum dah a tum thu leh hma a lak mek dante thlirin, HIV/AIDS dona kawngah state sorkarin theihtawp a chhuah tih a lang a ni," a ti.

Sanjeeva Kumar chuan, ziak leh chhiar thiam tamna, tlawmngai pawl chak tak awmna, a rama mi chêngte tlêm bawk si Mizoramah HIV/AIDS dona kalpui mek chu sâwt hle àwm tak a nih laiin, a hluar zêl zawk avangin natna dona kawnga hmalak mek dan enfiah a ṭula a lan thu a sawi a; ni hnih chhung review meeting neih turah kalphung pangngai a ṭha tawk lo em ni, tih inzâwt chunga ngaihtuahna thar hmang turin meeting-a telte a chah. Review meeting-ah hian UNAIDS, North Eastern Council, National AIDS Control Organization, National Health Mission, Mizoram State AIDS Control Society leh Health department aiawhte an tel a ni.