Corporation-a P&E Dept let turin JERC-in sorkarah rawtna thlen nawn

Joint Electricity Regulatory Commission (JERC) for Mizoram and Manipur chuan, Power & Electricty (P&E) department chu corporation-a let tura rawtna Mizoram sorkarah a thlen nawn.

JERC hotute hnen aṭanga Vanglaini thu dawn danin, P&E department, corporation-a let tura rawtna hi Mizoram sorkarah ṭum eng emaw zat an lo thlen tawh a, mahse, a la hlawhtling thei lo. An rawtnate hlawhtling lo ṭhin mah se, tun hnai khan Mizoram sorkarah rawtna an thlen leh a, a ṭhatna hrang hrangte an tarlang.

Tripura-in corporation hmanga power & electricty an kalpui dan chu JERC hian an zir chiang tawh a; an zir chianna behchhanin corporation anga kalpui ve tura rawtna Mizoram leh Manipur sorkarah an thlen ve ve. Manipur sorkar chuan rawtna chu pawmin, P&E chu corporation hmangin an kalpui tawh a ni.

Thâwk khat lai chuan P&E department chu corporation-a leh tumna a awm tih sawiin JERC hotute chuan, "Cabinet thlengin thu a kal tawh a, mahse, a file a pending leh ta vang vang a ni. Tun ṭuma rawtna kan thlenah hian hemi chungchang pawh hi kan sawi tel a ni," an ti.

JERC hotute chuan, Tripura-in P&E corporation-a an leh dan NGO hrang hrangte nena zir chiang tur rawtna pawh Mizoram sorkarah an thlen tawh tih sawiin, "Mahse, hei hi sorkarin a pawm lo," an ti a; an rawtna chu a technical em avanga NGO-te nena zir chian chi-a an ngaih loh thuin sorkar aṭanga chhanna an dawn thu an sawi.

Kum 2014 khan NGO pariat intélkhawmin P&E department chu corporation-a let turin an lo nawr tawh. Hemi chungchangah hian chief minister Lal Thanhawla chuan, "Sorkar hi páwng nawr ngawt chi a ni lo. P&E department corporation-a leh hi MNF sorkar hun lai aṭang tawhin sorkarin a ngaihtuah tawh. Corporation-ah let ngawt ila, thawktu tam tak chaw thlêng ben buaksak a ngai dawn. Anmahni'n an zir lo hle a nih ngawt loh chuan sorkarin tu chaw thleng mah ben buaksak a duh lo," a ti.

P&E department hian sorkar kum kal ta, kum 2015-16 chhung khan Mizoram tana kawlphetha lei nan cheng vbc. 210 vel an hmang a; kawlphetha leina aṭanga an sum hmuh aṭangin sorkarah cheng vbc. 166.62 an chhûng lut thung.

Kum 2015-16 hian kawlphetha lei nan cheng vbc. 210 vel hmang mah se, mipui aṭanga electric bill an dawn te, sorkar department hrang hrangin an hmanna man leh state páwna an hralh leh chhâwnna aṭangin sorkarah cheng vbc. 166.62 an chhung lut a; chu'ng zingah chuan state páwna transmission company-a investment aṭanga hlâwkna an dawn chu cheng vbc. 12.34 a tling.

Mipui aṭanga electric bill an dawn hi kum 2015-16 chhung hian cheng vbc. 132.87 a ni. JERC-in dân a siam angin, street light chhit man chu LAD-in an pe a, kum khatah vbc. 2.39 an chawi. AMC-in an huam chhunga street light chhit man an chawi thung. Mizoram chhim lama autonomous district council-te pawhin an huam chhunga street light chhit man an chawi bawk.