No Vehicle Zone Kalpui leh dawn

Coordination Committee on Traffic Managment chu nimin khan an chairman R Lalzirliana, Home minister hoin Secretariat conference hall-ah an
ṭhukhawm a; Krismas leh kumthar vuakvêta Aizawl khawpui chhung kawngpui tihthâwlna atan No Vehicle Zone kalpui leh an rél.

Meeting chuan, De-cem-ber 23, 24 leh 31-ahte Aizawl khawpuia kawngpui lûn laiah lirthei tlân phal lohna No Vehicle Zone siam leh ni se, an ti a; kawngpui dunga parking area siam danah mumal zawka thil kalpui a nih theih nan chiang zawka mawhphurtu insiam an rêl a ni.

Aizawl khawpui veng hrang hranga AMC thu-neih-na hnuaia parking area siam leh parking fee khawn chungchangah AMC designated area chin bak chu parking fee khawn tawh loin, designated area chhunga lirthei dah phal zat pawh fel taka bituk ni se, an ti.

Lirthei neitu zawng zawngte chu garage nei vek tura hriattir tawh an nih angin, kum 2017 ral hma ngeia siam turin Committee chuan a ti a; a mawhphurtu department chu mipui hnena hriattirna thla tin vawi hnih tichhuak ṭhin tura tih a ni.

Taxi intlân chhawk titawp tura Aizawl Taxi Workers Union ngenna chu Committee chuan tun dinhmunah chuan a ngai anga la kalpui rih ni se, an ti a; bus service tana special permit pek chungchangah State Transport Authority-in bus len dan leh a tlan theihna tura specification-te a lo tur tih a ni bawk.

Meeting-ah hian Transport minister John Rotluangliana leh chief secretary Lalmalsawma te pawh an tel a ni.